بعد شتريد اسويلك
اصيرن شمعة وضويلك
بعد شتريد اسويلك
ابوك بشوش* واشويلك
نسيت شچنت اطبخلك وشچنت آنة احشيلك
آنة اللي چنت البخلك ومن كل الالوان اخليلك
وبالصالون اذب آلاف حتى بتسريحة حلوة اجيلك
اثاري الطبخ واللبخ ميفيد شسويلك بعد يمعود دخيلك
ابن الاوادم نسيت شچنت اسويلك
من جنت تعطش وينكطع بوري الماي اگل لعيوني تبچيلك
واشربك من دموع العين ماي عذب يصفيلك
وك نسيت شچنت اسويلك
من چنت تتگلب وماتنام الليل آني اسهر وألوليلك*
والظهرية من تطفي الكهرباء أني اعرگ واهفيلك*
واذا بليلة مسج دزيت
ألم فلوس الكارت واعبيلك
ومن چنت تزعل علي جيش مشاية اوديلك
نسيت شجنت اسويلك
من اجيتني بطرگ دكان تبيع بي مصاصك ومساقيلك*
گلت رجلي وراعي بيتي
واجب علي لو ينكسر ظهري اشيلك
وحتى افتحلك محل بي خير ابيع بذهبي وابنيلك
وما كفت فلوس الذهب رحت تداينت وما جيت بيوم اشكيلك
وتسالني شجنت اسويلك !!!!!
ومن صارت عندك فليسات
صرت آني وجهالي كلشي مانعنيلك
ومن اطلع اشتري خضورات تغافلني وتروح تلعب بذيلك
رصيدك خلص من المسجات يوم سمسم يوم نمنم تقشمرهن بمراسيلك
وبكل ليلة تجي سكران وريحة نسائية تعط من مناديلك
واليوم....اجيت إلي ندمان تطلب سماحي وتتوسل اجيلك
تقشمرني بكلمة احبچ
من حبتك حية بعد ما يعبر علي فيلك*
شحسبالك احنة بالمكسيك؟
لو انتة بمدبلج وتتفنن بتمثيلك
ما ارجع الك لو حتى تبني قصور روح بعيد انتة وكفشتك* وتواسيلك
تگلي بحقچ چنت آنه غلطان
من گبر اللي لفك ووجعة التشيلك
وانشالله التاج محل رحلتي تكون
وانت لأبو غريب يصير ترحيلك
وحق ذهباتي البعتهن
مول لفتح يم محلك واشرد كل معاميلك
وحق شيباتي اللي من القهر طلعن
لاصير اصالة بت نصري واغنيلك
اسفة شوفلك غيري تكنسلك وتطبخلك وتكويلك
وتسويلك ولو ذرة من الچنت آنة اسويلك
اقتباس:
*بشوش : ومفردها بشّة وهي البطة او الوزة
*الوليلك:وهي عملية الغناء للطفل حتى ينچب وينام
*اهفيلك: كلمة قديمة ولم يعد لها استعمال بسبب توفر الكهرباء
*مساقيلك: ومفردها مسقولة وهو ماكنتوش عراقي
*فيلك : وهو الفيل , كائن يطير عندما يبدأ الانسان بالكذب
*كفشتك : وهي تسريحة غير قانونية يعني فاول
اختي العزيزة نسايم ..
هاي امبينه هواي اموجّره على زوجها
هههههههههههههههههههههههههههه
رغم أنه بالقصيدة هواي أخطاء بالوزن
بس حقيقة قصيدة جداً لطيفة
مشكورة اختي عالنقل
وموفقة إن شاء الله
تقبلي مروري
خادمكِ الصغير
وجدي الجاف
هاي امبينه هواي اموجّره على زوجها
هههههههههههههههههههههههههههه
رغم أنه بالقصيدة هواي أخطاء بالوزن
بس حقيقة قصيدة جداً لطيفة
مشكورة اختي عالنقل
وموفقة إن شاء الله
تقبلي مروري
خادمكِ الصغير
وجدي الجاف
ههههههههههههههههههههههه
ظليت اقراها وانا اضحك فقلت لازم نكسر الجديه الي في القسم احطها انعنش القسم ونضحك اشوي
أختي الفاضله/نسايم رعاك الله
بالرغم من أن الكلام مافيه من الوزن شيئا فقط القافيه
لكن لوحه معبره مؤلمة وأن هناك الكثير من العراقيات
المظلومات المضحيات بكل شيء لكن هناك بعض الرجال طبعهم الخسه
فلايعير أهميه لهذه التضحيات الجسيمة...
كل الشكر والتقدير لكِ أختي على نقلك هذا المشهد
موفقه
اللهم صل على محمد وآل محمد
نسايم
الله يعطيك العافيه على النقل طبعا على ارض الواقع
كثير من هذه الحالات لكن نحن عادة نعمل مثل النعامة
عندما تحس الخطر تدفن راسها في التراب
بس هم مو من حقها تكشف المستور بعد ان ابتعدت
عنه بس هيه غلطانه ودته لابوغريب وهي رايحه تاج
محل بروحهم فقر هناك والا اهي خبيرة اثار ؟
تبي تفتح مول خو تروح دبي احسن بلد فيه نسبة
الوافدين تقرب من 85% تربح خاصة اذا
استعملت الذكاء الخارق الذي تمتلكه !!
بايعه الذهب حق واحد عفطي قص عليها
اقترح عليها تبسط (بريخته لو العورا لو بمريدي)
هاي اسواق هيه تعرفها اكثر
ههههههههههه
شكرا للنقل الطريف
من حبتك حية بعد ما يعبر علي فيلك
تگلي بحقچ چنت آنه غلطان
من گبر اللي لفك ووجعة التشيلك
ههههههههههههههههههه والله كسرت خاطري هالمسكينة وعلى قولت عمي أبوتركي بما معناه والمعنى في بطن الشاعر، وحدة ثولة متزوجة عفطي ههههههههههه.
شكرا أختي نسايم لهذا النقل الفكاهي من زمان ما ضحكت هيج.
الله يبعد العفطية عن الثولات والسلام
عتاب من امرأة عراقية كلها وفاء لزوجها المتمرد
العرض العادي
