شاطي النهر
======================
بقلمي ؛ جعفر ملا عبد المندلاوي
25-7-2016م / 20 شوال1437ه
-----------------------------------------
دلوني الصبر من فگد الأحباب = مُرّ الموت علگم بس جرعته
ما ادري صدگ لو آني بالطيف = وسهام الفگد ترميني بغته
آنه الوالد آنه الصابر على الصار= عطيتك ياآلهي وانت أخذته
وزرعك چان أخضر عوده ريان = يوم اليبس بالطافك حصدته
ثِبت وبعالم التكوين باللوح = وقت الموت من يوم الـخلقته
واحنه على الأثر ياربي ماضين = أمر الخلق بيدك وأنت انت
كلّ حي بالزمان وعمره محدود == لازم ينفني وتنتهي مدته
لكن گلب والد وانجرح حيل = وصل حد العظم ياناس حزته
شحچي والشرح يحتاج تفسير = راح بضحك جاني النبض سكته
هو الماي كل شي يحتيي بيه = عجب ابني اختنگ بالماي موته
چم مرة وأزف للجنة أرواح == أزهار الربيع عبدالله وأخته
ملامح وجهه تحچيلي تفاصيل = من شاطي النهر جابولي چثته
چن بضلوعي يدوي يصيح بالناس= لحگولي إغرگت بعالي صوته
وأحسه ينادي يا يابه چنت وين= من آنه صحت والناس صنته
وصحباني تعاين چنّـه مقصود = أخذني الماي ؛إتطلعوني يمته!؟
وهذا الماي لوليدي چفن صار = هنيئاً هالشهادة اليوم جّــته
لكن يا حســافة الزمن غدار = ياخذ بالغوالي إشــما كرمته
أملتـّـك چبير تصير وأنخاك = وأفرح بيك يا نبضي ومهجته
ياروحي ودنيتي ونور العيون = رحت عني وراك الموت شفته
أشبگ صورته لو عطره أشمّ بيه = وتشهگ بالگلب يا ناس ونته
أغمض عين وأتلمس بقاياه ==== يتقطر براءة من جبهته
چان اهنا يقره ويگعد إهنا = يزرع ضحكته بساعات وقته
كل ظنوني خابت والأمل ضاع = يا ملح العمر وطعمه ونكهته
يا رمش النظر ومن الگلب روح = إشلون أنساه واتنفس نسمته
آلهي اجعل تراب الضمه من نور = ومن كوثر عليّ هناك شَرْبته
واجمعنا بجنان الخلد يا ربّ = بشفاعة أحمد وآله وعترته
وبالموقف عليّ يختم جوازه = وبيمنته صك براءة يروح جنته
نسألكم الدعــاء ....
شاطي النهر ْ~~
العرض العادي
