گالوها اهل الامثال = يلي تحب قيل وقال
گالوها لو كلمن نجر = بالوادي چا ماضل شجر
يلي تحب قيل وقال
----------
هاك استمع هالموعظه ويمكن تفيد ايامك
اعرف مقامك واعترف بخطائك وآثامك
ولو ردت تصبح فد رمز متخليه بإحلامك
خلي اختصاصك والعمل والنيه هم جدامك
يا عمي لا تطفر طفر = ميفيدك بيوم الحشر
لو جنت رايد تشتهر = للباري توب وبالحال
---------
الباري قسّم هالبشر ,خلاهها اشكال الوان
ونزل قوانين ووضع حق وعداله وميزان
وگال اعبدوني واتقوا ولا تركنوا للشطيان
وانطه الكرامه بحكمته لاهل العقل والايمان
حسبالك الجنه بشعر = ياعمي تدخلهه وتمر
وذنوبك بگد العمر =وعله الظهر ماتنشال
---------
صح انه لحسين السبط اكتب قوافي الاشعار
والناس من تقره الشعر تدعيلي تسلم عمار
بس الحقيقه الخافيه المحجوبه عن الانظار
شيطان انه بداخلي ويمكن زعيم الاشرار
ما تدري لو حان الامر = وانه بقوافيي افتخر
يمكن إمامي يحتقر = لكل القوافي التنگال
---------
خلي الشعر لاهل الشعر وروح ابتدي من الاول
واكتب قصيدة توبتك ودعي الالهك يقبل
وصدگني من تخلص اله هذا الوضع يتعدل
والباري ابواب العفو فاتحهها لليتأمل
من تخلص انته المنتصر = واعداك هيه التندحر
حرك يعمار الفكر = وحدد طريق الآمال
---------
وياعمي مو كلمن اجه أصبح أديب وشاعر
ولا صار مثل المعقلي بفن القريض وجابر
وبعدين خلي نعترف بالباطن وبالظاهر
النيه هي الفاصله بهذا الطريق الواعر
ان چان نيتك للبشر = ما تسلم بيوم الخطر
وهالدنيه مليانه عبر = متغيره من حال لحال
يلي تحب قيل وقال
-----
عمار جبار خضير
2009
الى عمار جبار خضير
العرض العادي
