[ميثم الرماحي]

السلام عليكم
اعزائي الشباب كل يقدم فائدة على حسب تخصصه
وبما اني شاعر اقدم لكم قصيدة تصف حال العريس قبل وبعد زواجه هديتا مني للشباب وللمشرف الجديد متمنين له الموفقية

واليكم القصيدة بقلمي ارجوا ان تنال اعجابكم

هذا الجره وهذا الصار حـمودي خطبوله مره
مايدري يوم ويومين والنوب تبدي الجرجره


من بعد ما عمره انباك وبراسه حل شيب الكبر
عموري قرر هاليوم يطفيها نيران الجمر
راح وركض للحلاق والكذله زينهه حــــفر
ساعه ترد لكدام ساعه يرده ليوره


عموري قرر هاليوم يترك الوحده ويرتبط
يكلبها عالمشــويات وبعينه ميشوف الكرط
باجرتغركه بالدين وجيوبه كلها تنخمط
وما يصفه تالي بالجيب غير التتن والمنذره



كبل الزواج بساعات عموري صاير عنتكه
ساعه يهيج عللبيت ساعه تشوف الدربكه
كل اهله دخلهه انذار وتكول جنه بمعركه
واحد يعدله القاط واحد يلمع القندره




من بعد ما لم الناس واكترب موعد زفته
جاب الربع والاحباب هالليله كله لحنته
مايدري يوم ويومين والنوب تكبر علته
ويصير بيد أم البيت محبس وهي تفرره




باجر يعرس ياناس والحلم ذاك يحققه
مايدري حكم الاعدام بيده الغشيم يوقعه
عكب السعاده يندار عالركبه حبل المشنقه
والقاضي كدام الناس كل ساعة بيده يجرجره




بس ليله وحده والنوب تبدي المصايب والطم
يبدي يكص كرنكات بس كصه وحده وينكطم
عكب السعاده ياناس كل ساعة بوري يلطم
والدم على خدوده يسيل والكصه كلها مطبره

هذا الجره وهذا الصارحـمودي خطبوله مره
مايدري يوم ويومين والنوب تبدي الجرجره

[حميد م]

شكرا على هذه الهدية الرائعة
وبالخير على عموري
وكبل العرس جان يصيح يايمه اخطبيلي مره

[تارك الاحزان]

اقتباس : المشاركة الأصلية كتبت بواسطة ميثم الرماحي [ مشاهدة المشاركة ]

من بعد ما لم الناس واكترب موعد زفته جاب الربع والاحباب هالليله كله لحنته مايدري يوم ويومين والنوب تكبر علته ويصير بيد أم البيت محبس وهي تفرره

ههههههههههههههه
مبرول على عموري يستاهل
وخلي يحضر نفسه ويتعاقد وي الدكتوره

[حميد م]

صباحيه مباركة لعموري

[حميد م]

ينقل الى قسم الشعر الشعبي
وتحياتي لميثم الرماحي

[قوافي الأيثار]

حلوه جدا بس هو منو المتزوج عموري لو حمودي يمعود لاتسوينه سالفة

[زكي الياسري]

يابه الروايه عن لسان حمودي انه عموري الي خطبوله مره
و الشاعر اعلم

تحية لأبداعك الملفت يا ميثم الرماحي
انا من اشد المعجبين بأشعارك الراقية

و ابقى
دوماً في انتظار جديد يراعك المعطاء

[حميد م]

الخطبوله مره هو عموري
واني حورته لحمودي ابني لكن نسيت اغير النص
عذرا للشاعر

[سفينة البحار]

ميثم الرماحي
متميز في اي لون كتبت
لك مني كل الود


وعلى الخير والبركةوهلهوله
حمودي وحدة من الطرف خطبوله
تحيــــــــــــــــــــــــــاتي

[ابوتكتم الخير]

قبل أن أهني (عموري ) حمودي
ميثم الرماحي
لون من الشعر لا يضاهيك به أحد
وسودة بوجهه الي يستلمه قلمك
شيخ حميد بالبدايه مبروك على حمودي هذي الخطوبه
وثانيا إحنه زعلانين لأن ما عزمتنه والعزيمه يرد عليها الرماحي
بكم بيت بس من العرفهن ( شيخنه بسيطه )
مبروك بزعل