قصيدة تحكي معاناة احد الاشخاص الذي شارك في انتفاضة شعبا

سلام امين تامول · بتاريخ : 14-09-2007 الساعة : 11:36 AM

قصيده هزليه تحكي معاناة احد الاشخاص الذي اشترك في انتفاضة شعبان 91

طلب مني الهويه وكلي جاي منين

كتله من النجف بس اصلي شاميه

كال اهلا وسهلا جنت غايب وين

ادور من زمان وضايع عليه

لازغرا كلت ما اعرفك وناسيك

ذاكرتي ضعيفه وتعبت شويه

كال انزل واذكرك يالنسيت الناس

ياما جنه ناكل فرد صينيه

نزلت وياه واخذني لمحجر التوقيف

شو شدو عيوني وجتفو ايديه

واحس جن صعدوني بايفا بيهه الناس

سطر ارياز كونيه على كونيه

مشت بينه ووصلنه لسجن تحت الكاع

بعد ماعرف صبح من الغروبيه

ثلث تيام بي ضليت بس شتريد

كمشوني بصفر حسباي بضحيه

صاحو بسمي كلت افرجهه داحي الباب

لنه يكلي اجتنه عليك برقيه

خذوي مجتفيني لغرفة التحقيق

فتح عيني صديجي وجابلي اميه

وكال احجي بصراحه ولا تضم وتخاف

سولفلي الصدك لاتجذب عليه

احاول ردت اقنعه بجذب بس معقول

كتله انه وحيد وعون ماليه

بكال اشتغل وببيتي جومه اطفال

يتانوني على باب البيت يوميه

ومن تطلع شمس لمن ترد وتغيب

بتكيكيني كاعد وره البسطيه

كال اشلون اعرفك ما جذبت وياي

كل حجيك صحيح وصادك النيه

كتله احلفلك انه بيا يمين تريد

كلامي من اوله صادك لتاليه

كال احلف وخليت ايدي عالقران

لن الارض كلهه اتزلزلت بيه

تبين حته قران الله للتعذيب

بي اسلاك ربطو كهربائيه

كال اكعد وخلي نسولف انه وياك

وخل لسالفتنه نرد الاوليه

تذكر وين جنه الواجب نكضيه

ومهيل الجاي نشربه ليليه

ويوم اللي ركبنه البيكم انته تسوق

نفتر عالمفارز رحنه دوريه

وبالبيكم اخذنه الاكل للثوار

المنتشرين على خط الدوانيه

ومن جابو الريم وبيهه شفنه جنود

موش انته الجبتهم للحسينيه

ويوم التحركنه وللنجف ماشين

وحملنه السلاح بذيج الامسيه

ولمن عطل عدنه السبعه والخمسين

من صلح المدفع بالجريويه

صحت باطل كلامك وارتكاب وزور

ليش انتم على الفقره ارتكابيه

كال ولو جبت شاهدبعد وياي

ينطيك الحقائق ميه بالميه

كتله موافق انه اشعندك من شهود

لا غوغائي لاحاربت بعثيه

شغل فيديو لن اني والثوار

لا شرقيه اصييح ولاهي غربيه

واسب الطاغيه واحجي بعلات الصوت

واهتف انتفاضه وثوره شعبيه

وما اجذب عليكم ما شفت يخوان

بس ذني المشاهد وانغمه عليه