[خادم_الأئمة]

اوه اوه صج صرت اكتب بسرعة ومااثبت ... الكلام كان للخيّة فراشات الزهراء لكن العجلة من الندامة


الاستاذة عاشقات اهل البيت عليهم السلام

فيه قضية بعلم الرجال ، انه الشاذ لا يُعتد به بالاجماع وطبعا الشاذ المقصد منه هو قيام فرد من بين الجماعة بفعل امر معين فبطل الاستدلال ، يعني لازم ندخل كل العلوم مره وحده حتى نقدر نرد :p


أما المثل انا اصر عليه يعني هذا المثل جنابي الكريم قاله فصحيح صححته سيدتنا ام حسن ويكفي هذا التوثيق

============================

تقول استاذتنا فراشات الزهراء


وبعدما يكبر ويشب يأتي دور الإطلاع والمعرفة في تغيير مساره ويملك بيده الخيار

لكن في عصر ملؤه الخيارات والعروض المغرية وسهلة المنال : كيف للآباء التدخل ؟



طبعا التدخل يكون بمثل ماقلت بالسابق وهو :

اقتباس :

والصحيح دائما انه بمرحلة السنة إلى سبع سنوات نكون آباء ومن سبع سنوات إلى 18 أصدقاء حتى يتم تربيته تربية صحيحة

فالاجبار حل غير رياضي في هذا الزمن ابدا
يعني الحين الجيل القادم يطبقون المثل "خالف تعرف"

فتخيلوا الشباب الحين مثل القنبلة الموقوته
ناطرة الوقت الي تنفجر فيه
واذا انفجرت ماتعرف لا عدو ولا صديق
تعرف بس تدمر

يعني الحين كمثال :
شوفي "سبجوه" حجاب تلبسينه غصبن عليج انا ابوج اوامري تمشي فاهمة؟
سبيجة تقول : يبا مابي !
ويقوم الابو يطقها طق!!!!

هل تظنون انه لمن تطلع تكون شحليلها مؤمنه منزله راسها ؟

لا يبا نصهم من يطلعون حطوا الميك اب وقطوا الحجابات

واتكلم عن واقع خاصة عند "البعض" من فئات المجتمع الاخرى يعني نقاب يايه ومنزلة راسها جدام الوالد ، الي يشوفها يقول الحمد لله طلع الطق له فايده !
من يمشي راحت تكرمون الحمام وقطت النقاب !
والويه ملطخ مكياج

لانه حتى السيارة ممنوع عليهم

فالحل شنو ؟
الحل انه نقعد مع البنت

الابو : يبا انتي صرتي مره "مشدْقة" عودة الحين يعني لازم تلبسين الحجاب
البنت : يبا بس انا توني صغيره ! ابي اشوف شبابي الي راح ابلتش بعدين لمن اتزوج!
الابو : يبا شوفي فيه شي ديني ودنيوي ، يعني بالنسبة للدين كان الرسول صلى الله عليه وآله يدعوا للبس الحجاب ، وكذلك الي تبجين عليها بكل سنة فاطمة الزهراء عليها السلام والي رحنا لها الصيف الي طاف السيدة زينب هذول كلهم مو المفروض يكونون قدوة لج؟
البنت : اي والله يبا ، لكن حق شنو الحجاب ؟
الابو : والله يا بنيتي شوفي الحجاب استر للبنت ، ادري عيون اغلب الرياييل بالكره الارضية فيهم بلاغة جف انه لازم يطالعون حتى لو مو مركزين لكن فَكْري شنو نظرتهم لمن يقولون ماشاء الله لابسة لبس محتشم وجميل وبين الي يطنزون عليها ويعتبرونها والعياذ بالله صيدة سهله ؟ (لو أنا منه اقولها مصختيها ... لا اتقشمر:p)

البنت : يباااا شفيك قمت تقط خيط وخيط! شكو الحجاب باللبس المحتشم؟

الابو : يا ذكية يا بنيتي مثلا بتلبسين حجاب مع قنيلة بوعلاّق مثل بعض الاخوان الاعزاء الصعايده بشقق العزابية ملوتهم؟ اكيد وتوابعه انا اقول يعني عباية وحجاب ولبس فضفاض وهكذا!!!!

انتهى

بهالنقاشات العقلية نقدر نخليهم يمشون بالطريج الصحيح ولا خوف عليهم ابد
واحسن حل ان يكونوا اصدقاء للعيال



وبعض الابهات الله يعينهم دفشين !

يعني مثلا بيتأكد من سجلات مواقع الي دخلها ابنه الشاب !

شيسوي؟
يقول لهم : هاااات لابتوبك بستجوبك ، متى دخلت هالموقع وليش وشحقه ؟

هذا الاسلوب غلط
اخذه باللين وفهمه الغلط من الصح ، فكل ابن ادم خطاء !


===========================

الاستاذة مريم محمد :

محد يقدر على لساني يا حجية مريم فما ينفعج ابد الاستجوابات لانه راح نصعدج المنصة ونرد على محاور استجواباتج:p:p:p

اي ألا ليت الشباب يعود يوما ليخبر حجية مريم ماذا فعل الشيب بها