ياشهر عاشور
قصيدة لأستهلال شهرمحرم الحرام
ياشهر عاشور هم مثلك شهر ....كسفت الشمس وخسف بيك الكمر
***********
ياشهر عاشور الشمس إكسفت
والكمر عل المشرعه عيونه طفت
وبيك زينب يا شهر وحيدة بقت
وبالبراري حرم وطفال شردت
ياشهر هليت بالهم والكدر
**************
ياشهر بيك الحسين إعله الثره
بسيفك العاشر تكطع منحره
وجبد أبو السجاد سهمك وذره
والجسد تربان طفك عفره
ورضرضت خيلك يمشؤوم الظهر
**************
عن الأكبر يا شهر هذا السوآل
شاب عنده من النبي كل الخصال
وذريته برمح وسيوف ونبال
هذا حيدر لو محمد عل الرمال
لوأبو اليمه صفه جسمه وذر
**************
ياشهر وين الذي عاف العرس
وشال سيف الموت والطاس وترس
جفوفه بالحنه محنيها أمس
صدك ظل مطروح جاسم بالشمس
ياشهر عاشور والراس إنطبر
*************
وارد أسألك ياشهر عن الكفيل
ذاك أبوفاضل إبن حامي الدخيل
كلي روه سكينه بالماي وعليل
كلي جفه الماي هم يكدر يشيل
وشال جوده والعلم لو ما كدر
*************
صدك عباس انبرت منه الجفوف
صدك غايب كمر هاشم بالطفوف
صدك طفه السهم عينه ومايشوف
صدك حزت ركبته بيض السيوف
وظهر أبواليمه على الشاطي إنكسر
***********
يا شهر زينب صدك مجتوفه
و ركبت الهزل مشت للكوفه
وعل الرمح راس الحسين اتشوفه
وعل النهر جسم الكفيل تعوفه
ومن بعد عباس سابيها الشمر
طالب شفاعة الحسين
ابوتكتم الخير
ابوتكتم الخير:قصيدة :ياشهر عاشور
العرض المتطور
