[عبود مزهر الكرخي]

أنشر لكم هذه القصيدة من شعر جدي الشاعر الشعبي الراحل الملا عبود الكرخي وهي بالشعر العامي وباللهجة البغدادية وهذه القصيدة كتبت في ثلاثينات القرن الماضي وهي تحكي عن واقع البرلمان والحكومة في ذلك الوقت والتي تحكي عن ما يجري في واقعنا الحالي وهي كما قلت بالشعر العامي الذي أرجو من الله إن يكون مفهوم عندكم لبعض الكلمات العامية البغدادية وهي تفسر الواقع في ذلك الوقت وما أشبة الأمس باليوم حيث تحكي عن واقع البرلمان والحكومة ووضعية المواطن في وسط هذا الموج المتلاطم من الأمواج السياسية والتي لاتجد لها قرار وأقرءوها وسوف نسمع ردودكم عن هذه القصيدة

قيم الرگاع من هاي اللحه..........اتشوفه هيبه وعنده لحيه امسرحه

يشتم ابلا خجل وبلا مستحه........من ايحس المقعد اشويه اندحچ

قيم الرگاع من ديرة عفچ

برلمان اهل المحابس والمدس...........عگب ماچانوا يدورون الفلس

هسه هم يرتشي وهم يختلس...........ولو نقص من راتبه سنت انعقچ
قيم الرگاع من ديرة عفچ

اتشوف واحدهم امعگل بالوقار.........وبالاصل تاريخه اسود كله عار

ابضرف ثلث اسنين مليونير صار...........ايريد عالوادم ايعبرله چلچ
قيم الرگاع من ديرة عفچ

گمت ما اعرف حماها امن الرجل..........ياهو التكضه اهو ايمثل العدل

وگمنه نستورد الشلغم والفجل...........لان كلها ضلت اتدور ودچ
قيم الرگاع من ديرة عفچ

والله ضيعنه الصدگ من الچذب......اتشوفه هيبه وحچيه المصفط عذب

ياخذك وايردك ابشرق وغرب.........وبسچاچينه يدچك حيل دچ
قيم الرگاع من د يرة عفچ

حيل دوخني الحچي الماله ربط.......وصار عندي سكر وحصبه وضغط

نفترش عاگول ونتغطه ابحسچ
قيم الرگاع من ديرة عفچ

گمت ما اميز الذيب امن الحمل...........امنين ما التفت گلبي يشتعل

انه ما شايف شعب يتبع خبل.........شاب راسي وتيهت كل السچچ
قيم الرگاع من ديرة عفچ

يا حكومتنه الرشيده ام الوقار..........الفساد المالي عنوان الچ صار

ندري جابوكم ابدبابه وقطار.....ليش ضليتوا سمچ ياكل سمچ

قيم الرگاع من ديرة عفچ

لازم انميز الزين امن الزلم...........وننتخب كلمن شهم صاحب علم

ونرفض اللي يجي كل يوم ابفلم........من ايشوف المنصب اشويه اندرچ
قيم الرگاع من ديرة عفچ