[قاسم حتروش]

مظلوم ** مظلـوم ** هــــــذا الشعب مظلوم
بخير الوطن متساوه *** ويّــــــه ألعيشه يتلاوه
هـــــذا الشعب مظلوم
**************
بالوطن كــل أحنه نــدري وأبد ما تخفه الحقيقـــــة
وهاي كـــل الناس تعرف بالتفاصــــيل الدقيقــــــة
مليان خيرات البلـــــد عكس جيرانــــه الشقيقـــــة
بالتجارة وبالصناعة وبالزرع واضـــح طـــــريقة
والسياحة ألأدري عنها ** كل شعبنه يعيش منها
لو أجه واحـــد ضمنها ** بالدليــل وبالـــــــوثيقة
مـــعلوم * مـــعلـوم ** الكل الناس معلــــــوم
بلدنـــه يفيض خيرات ** بـــــس عايش بويلات
هــــــــذا الشعب مظلوم
************
بعد أريد أنطيك فكره بيا وطن يا محب ساكــــن
ومــــا أعددلك وأكلك وأضـل أحسبلك أمـــــاكن
وما أزايد لــــــو أغالي وأبقه أذكـــــر بالمحاسن
كل بقعـه بي هذا الوطن تفيض خيــرات ومعادن
كل شبر من هذا البلد ** مليان ثــــــروة للشدد
وحك قل هو الله أحد ** خيره عالي يا مواطن
مرزوم * مرزوم ** بأرضه الخير مرزوم
خيره بكل وكت جاري ** وهاذي رحمـة الباري
هــــــــذا الشعب مظلوم
**************
تدري ليش الوطن هذا نال كل هاي ألكرامـــــــــــه
لأن حاضن جسد طاهر للوصي حيـــــــــدر إمامـه
وحضن جسم حسين أبنه وأربعة من أهــل ألزعامه
وحضن جسم الأخو ألوفه وأنطبر بالعمد هامــــــــه
والمهدي راعي الغانمة ** لــو خرج ينهي ألظالمه
يتخـــــذ منـــه عاصمة ** ومنها ياخــذ كــل مرامه
مالــــوم * مالــــوم ** كلبــــه يـــــــــون مالوم
مــــــن طبرة المحراب ** وعــل عصروهــا بالباب
هـــــــــذا الشعب مظلوم
*************
لــــو نجي لقـادة شعبنه ومجلس النواب مـــــــــــــنهم
بجلسه وحــــــده يقرونه للقرار اللــــــــــــــي يخصهم
وليخص الشعب هـــــــذا يأجلــــــــــــــونه وما يهمهم
والعجيب يعاملونــــــــه كـــــــــــــالغريب ومو أهلهم
ليا يوم نبقه بهل وضع ** لا ديــــن همهم لا شرع
وأحكامهم مـــا تنجرع ** ضد شعبنه اللي أنتخبهم
يــا يوم * يــــــا يوم ** كلي شوكت يــــــــا يوم
بيهم مجلـــس الشوره ** يهتــم ويشـــــــــع نوره
هــــــــــذا الشعب مظلوم
*************
هل سؤال اليوم اسأله لكل شخص يعمـل سياسي
ليش عفت الشعب حاير وملتهي بـــس بالكراسي
وهمّــــك الأول مكانك وعفت شعبك للمـــــــآسي
ليش متداوي جروحه وتترك الكرســي الرئاسي
منكم وبيكم هالمــــلل ** ليش التجافي والجهل
صبر الشعب حده وصل ** كــول مره ذوله ناسي
لهمـــوم * لهمـــــوم ** عــــنهــم شيل الهموم
كافي هالفعل كـــــافي ** عـلينه الأمر مو خافي
هذا الشعب مظلوم


يله يا مظلوم يلـــــــــــــه ** شيل أيدك ويــــــه ديه
واخلط الدمعي ويه دمعك ** وانــــدبه الـرب ألبريه
وبكلب مكســـور ادعـــي ** هـــل مسه وبكل مسيه
يا ربي يا واحد أحـــــــــد ** يا قل هــــــــو الله احد
عجل فرج راعي الشــــدد ** المنتظــــر ابن الزجيه




الشاعر
خادم الحسين (ع)
قاسم حتروش البلداوي
أسألكم الدعاء

[عبدالله خلف العتابي]

السلام عليكم
الشاعر البداوي
قاسم حتروش
رائع ما نطقت به قصيدتك
ووفقك الله لكل خير ولك
سلامي وللاخ حيدر غني
وعماد البلداوي وعامر البلداوي
تقبل مروري
تلميذك المبتدا
عبدالله العتابي

[قاسم حتروش]

اقتباس : المشاركة الأصلية كتبت بواسطة عبدالله خلف العتابي [ مشاهدة المشاركة ]

السلام عليكم الشاعر البداوي قاسم حتروش رائع ما نطقت به قصيدتك ووفقك الله لكل خير ولك سلامي وللاخ حيدر غني وعماد البلداوي وعامر البلداوي تقبل مروري تلميذك المبتدا عبدالله العتابي

الأخ العزيز
عبد الله العتابي
الله يوفق الجميع لخدمة محمد وال محمد
وان شاء الله سلامك يوصل للجميع
تحياتي