[ابو ياسر الكعبي]

الحزن لو لِگط متغسله المسرّات

وحِزن گلبي لِگط ونطبُع عالثوب ..!!

ومازلتُ والوجع بإنتظار الـوجع

[ابو ياسر الكعبي]

رُبَت ويّاي من زغري العذابات

وغطـّتني بحزنها ادموع يعگوب
الماعنده أهل وبحَسْرته يبات

تضل إمْـعلـّگه عينه عله البوب ..!!

[ابو ياسر الكعبي]

ياغريب ....

إشْحصَّل السيّاب گبلك من غُرْبته

وشكثر جر عيسى بالمنفى الصليب ..!!

[ابو ياسر الكعبي]

طحت ما خانِتك رجليك ...

بس الگاع هشَّه وثـُگل صبرك زلزلاها وداس ..

[الروح]

طحت لا ماطحت هاي الأرض تندار
تريد بكل تواضع تنحني لراسك ..!

[نزار الفرج]

بسم الله الرحمن الرحيم
ونيّت ونّه فوكَ ونّه...او جرحي طبيبي جزع منّه
ابو محسد النجفي

[ابو ياسر الكعبي]

حياك الله ابو محسد

گبل چانت الدمعه بعيتي بت بيت

أضن حتى الجفن مايدري بيها

وهسه إعليك ضلّت كاضّه الباب

الرايح واليجي يباوع عليها

مما راق لي

[نزار الفرج]

بسم الله الرحمن الرحيم
كَت يادمع فوكَ الوجن= جسمي اشتعل طفيني
وان ما بجيتي دم حمر= ريت العمه ياعيني

[زكي الياسري]

بـِچـيت الدمعه فوكَـ خدودي تيزاب
وعندي الونة صـــارت خبره بيهه

وصرت لو يوم ما زارتني لحزان
اروح السوكَـ هَجرك* و اشتــريهه


و للوجع بقية

* سوق هجرك
يقع في شارع تعبان مقابل اسواق المهموم التجارية

[ابو ظاهر البركي !]

اقتباس : المشاركة الأصلية كتبت بواسطة زكي الياسري [ مشاهدة المشاركة ]

بـِچـيت الدمعه فوكَـ خدودي تيزاب وعندي الونة صـــارت خبره بيهه وصرت لو يوم ما زارتني لحزان اروح السوكَـ هَجرك* و اشتــريهه و للوجع بقية * سوق هجرك يقع في شارع تعبان مقابل اسواق المهموم التجارية

الله يامولاي


كنت ابحث عن دكاكين السعاده
بلجن اشريلي فرح
لا, ولو حته ابتسامه

خذني وكتي وذبني يم سوك البواجي
هنااااااك
جابولي فرح بس جان باجي


وفي السوق مراحل اخرى من الوجع