سافر من تسافر واترك الروح
ترى بعدك بروحي شكد نياشين
لا تاخذ جروحي وتترك انسان
بلا جروحه يظل مثل العناوين
تعلكها على بيبان المسافات
وتدك عنوان هجرك فوك السنين
وتجي بكل جرأة تسألني شعفتلي
عفتلك جرح يجري انت شعفتلي..!؟
عندما يتشضّى الوجع يتناثر الجمال,
"
أنه الكلما أسافرأترك , الروح
وأطش جروحي بعيون التَجافي
إبكد ما أكل بيّه الوجع , مابوح
شما ياكل أكلّه إشبع عوافي
أضحك من جذب , بس آنه مذبوح
شايل جبل همّك عله اجتافي
أتنفّس شِعر مَدري أشهك اجروح
تهت بين المواجع والقوافي
شلت إجنازتي ومتعني لأهلي
عفتلك روحي كلها , إنت اشعفتلي
تلويحةُ وجع ٍ مزمنٍ ايتها الروح ,
ولكل رواد الوجع ترانيم روح ٍ تنتظر وجعاً جديد
أنه العلمت چفك يخنگ الموت
ومن أتعلمت چفك رماني
أكابر حته أحاول بلكي ماموت
ومدري شضاملي بغدرك زماني
يالمفصلي بيدك خوش تابوت
شوف أنه شكثر منك أعاني
مثل يونس صرت مبلوع بالحوت
وأحلم بالحياة أوياك ثاني
أكيف لو خبر من عندك أيفوت
على بالي يناكر كل حناني
أحسنك صرت تمثال منحوت
أطشرنك وألملم بالأماني
روح وداعة الله مني مبخوت
بس لتگول لليسأل نساني
كل لحضه أعله بالي طولك أيفوت
أنه موقت مرورك بالثواني
منو مثلي حسبلك ياهو مثلي
عفتلك كل شي كل شي ما عفتلي.
[/CENTER][/SIZE][/FONT]
يوارث من بعض حزني ابتسامات
توزّعها على عيون اليتامه
طبع كلبك على حروفك حمامات
أحس بكل نبض تسكن حمامه
امانيّك على الحايط علامات
منحر كل جرح يرسم علامه
إخِذ من دولة أوجاعي قيامات
عذاباتي قيامه بصف قيامه
إنزِف عالحبر كلبك محطّات
وعلى ضلوع الورق ترجم كلامه
غير الوفه بروحك لاتخلّي
عفتلك ذكرياتي , انت اشعفتلي
..........................
العزيز ابو الحسن يبدو لي انك سترثُ وجعي أيها القادم من سرادق طفولتي !!
وللنازفين وجعهم محبّتي واشتياقي
بعدك يا وطن يوميه عاشور ما بطَّل نزيفك صار اله اسنين
چنَّك يا وطن للذبح منذور ودمَّك متّصل وي دمّ الحسين
گصه الإرهاب بينه ابظلم وبجور وليل الخوف نام ابطارف العين
غصنها شجرة الزيتون مكسور وحرگو حاصل الزيتون والتين
كل أم ظلَّت اعله الباب ناطور اتخاف من الظلام اعله العزيزين
بجويريد أحس ابمايك ايفور حزن كلَّك حزن ويجمّر الطين
مات الرازقي ابضربة الساطور وغصن الياسمين انكسر نُصِّين
بعبوة ناسفه اتفجَّر الناعور حتى الماي ما يسگي البساتين
شيريد الظلام ويذبح النور ويغتال الفرح من المعرسين
اتشيل من القراءة الدار والدور لئن يردوك بس گاع الشياطين
أرضه بيك لو كل لحظه عاشور وكل يوم العراق ايصير الحسين
العرض العادي
