[** مسلمة سنية **]

اخي الكريم محمد .... بصراحة قناة المستقلة ما بتيجي عندنا ..... لكني شفت على يوتيوب بعض المناظرات التي كانت منتديات السنة تضعها على اساس انو الطرف السني حجتو اقوى ..... غير عن هيك انا لما قررت اتعرف على المذهب الشيعي نتيجة اصرار البعض على تكفيرهم ( احد الأسباب التي دفعتني الى هذا الطريق كان الهجوم العنيف ضد الشيعة في بعض المواقع مما اثار لدي الفضول لمعرفة هذا المذهب ... هل صحيح انا بدافع عن ناس كفار ؟؟؟؟ هل انا بكفر لما احكي تعاملو معهم بالحسنى ؟؟؟؟ شكيّت بحالي !!!! ) المهم قررت اتعرف على المذهب بلاش اكون بكفر و انا بدعو للوحدة بين المسلمين !!!! لكن كنت اشوف في بعض المواقع تحذير من التعامل معهم ... لأن الشيعة كفار .... كاذبون .... منافقون ... عندهم خزعبلات و قصص اصلها فارسي او مجوسي ..... أشر من اليهود !!!! بصراحة بعد كل هاد خفت اني اقرأ بمواقع الشيعة بلاش يأثروا عليّ ..... فقررت اتعرف عليهم من مواقع السنة ....... و قرأت كتير اشياء و امور عنهم و كتير مناظرات بينهم ( لكن طبعا في مواقع السنة ) بصراحة في البداية نفرت منهم و استغفرت ربي اني اكون غلطت في دعوتي للوحدة معهم ( يمكن هالحالة استمرت معي 3 ايام .... حتى ما عدت اقدر احط على قناة المنار .... و لما كان السيد حسن نصر الله يبين بالتلفزيون كنت اطلّع عليه و احكي الله بيعلم شو مخبي ورا هالكلام المعسول !!!!! ) ... المهم بعدين خلصت من هالشعور و وصلت لحالة حزن كبير على الشيعة ..... مساكين كيف ضلوا عن الطريق .... و مو ملاقين حد يدعوهم بالحسنى .... ليش كل هالحرب عليهم طيب ليش ما يدعوهم بالحسنى ..... الله بيعلم شو المراحل اللي مرت فيها نفسيتي .... المهم قررت انو انا ما الي دخل ليش مغلبة حالي .... في علماء و هم مسؤولين عن الدعوة و حاولت انسى الموضوع ..... و انقطعت فترة عن المنتديات ...... لكن ما بعرف في شي شدني و صار شي يدفعني اقرأ عندهم ( لاحظ انا لهون متأكدة انو المذهب السني هو الحق و ان المذهب الشيعي قد ضل و ما في عندي اي شك بالموضوع فانا حصّنت حالي و قرأت اغلب شبهات الشيعة و كيف السنة بيردوا على هاي الشبهات.... ) طيب .... بديت اقرأ و كنت بنكر كل هالكلام .... يا الله شكلهم عنجد بيألفوا قصص ما الها اي اساس .... ربنا يهديهم ... ( كنت في حالة كر و فر انقطع و ارجع افوت عالمنتديات مصدومة من اللي بقرأوا ) شوي شوي لقيت ادلتهم من القرآن و من كتب السنة !!!!!!!! بديت اتدبر في الموضوع .... و باقي القصة بتعرفها في موضوعي ....

المهم اني بدي اوصللك اخي محمد اني كنت مطلعة على ردود السنة على شبهات الشيعة حتى الكتاب اللي بعتلي اياه حاولت اتصفحوا لقيت في نفس التفاسير اللي ما عادت تقنعني ..........

اخي محمد ..... رسولي الكريم عليه و على آله اشرف الصلاة و السلام قال : " أيها الناس قد تركت فيكم ما إن أخذتم به لن تضلوا : كتاب الله و عترتي ، أهل بيتي " يعني المفروض انا نتمسك بآل البيت بنفس القوة اللي بنتمسك فيها بكتاب الله ...... و ايضا قال عليه و على آله اشرف الصلاة و السلام : " فانظروا كيف تخلفونى فيهما" يعني رسولنا وصانا بالدفاع عن آله الطاهرين بنفس القوة التي ندافع فيها عن كتاب الله الكريم .... طيب لما تقرأ التاريخ و في الكتب الموثوقة و تعرف الظلم اللي حل بآل البيت .... كيف بتقدر بعد وصية نبيك انك توخد دينك من الناس اللي ظلموا آل البيت ؟؟؟؟؟ كيف بتقدر توخد دينك من ناس بيدافعوا و بيترضوا عن اللي ظلموا آل البيت ؟؟؟؟ انا شفت انو في خلل كبير بين وصية رسولنا الكريم صلى الله عليه و آله و سلم و بين الدين و الواقع اللي عايشينو..... صدقني انا انسانة مش من السهل تغير رأيها و لو ما اقتنعت بهالشي ما كنت تشيّعت ....

ادعو الله ان يثبتني على الحق .... و ان ينير بصيرتي اكثر .... و ان يساعدني في طريقي ...... كما أسأله الهداية لجميع المسلمين.....

[** مسلمة سنية **]

اخوتي بعرف اني غلبتكم معي بس ما في الي غيركم .... بدي تدلوني على كتب بسيطة عن العقيدة و العبادات عند الشيعة .... يا ريت بالأول تكون كتب بسيطة حتى اقدر اشكّل المعالم العامة للطريق الجديد و بعد هيك بتعمّق بالموضوع .... و ربنا يجزيكم كل خير ....

[ملاك القوة]

بعتذر عن القصور وفي كتب يسيرة جداً للموالين مثل: عقائد الامامية لناصر مكارم الشيرازي والمظفر
هذان كتابان يسيران جداً
لكن بعتذر منكم أختي المواليه وإن شاء الله يدلوك الاخوة المختصين بالأفضل لأن الكتب عدنا ممنوعه

ومبروك لكم ركوب سفينة النجاة

[محمــــد]

السلام عليكم
اختي مسلمة رح اسئلك سؤال بشكل مباشر
ارسلتلك اكتر من مرة رسالة عن طريق اخد المنتديات على الخاص
وصلتك و ئريتيها ولا لا؟؟؟
ارجو الاجابة

[** مسلمة سنية **]

محمد بصراحة و بصدق انا الي زمان ما فتت على هداك المنتدى ( الدفاع عن الصحابة آخر فترة كنت افوت كزائرة مش كعضوة علشان اقرأ المواضيع )...... و كمان انا مش من النوع اللي دايما بفحص ايميلي ..... لكن قبل تلت او اربع ايام فتحت ايميلي و كانوا باعتينلي انو واصلني رسائل على المنتدى فاضطريت و فتت ( مع اني ما كنت ناوية ارجع افوت عليه ) فتت و استغربت من الرسائل و بديت اكتب في رد الك حتى اني حفظت جزء منو على جهازي لكن صار معي ظرف و ما كملت الرد و بعدها انشغلت ... و بعدها ما رجعت فتت و ما بعرف ازا في رسائل جديدة .... بجد آسفة بس ما كنت بدي ارجع اسمع نفس التبريرات لظلام آل البيت .... آسفة كتير محمد

[محب نصر الله]

اقتباس : المشاركة الأصلية كتبت بواسطة محمــــد [ مشاهدة المشاركة ]

السلام عليكم اختي مسلمة رح اسئلك سؤال بشكل مباشر ارسلتلك اكتر من مرة رسالة عن طريق اخد المنتديات على الخاص وصلتك و ئريتيها ولا لا؟؟؟ ارجو الاجابة

كم نتمنى من الأعضاء المحاورين يبتعدون

عن الحوار عبر الخاص ليتسنى للجميع الاستفاده

والهداية لطريق الحق ولا تقتصر الهداية على

اشخاص معينين!!!

[** مسلمة سنية **]

ملاك القوة مشكورة .... و ازا الكتب عندكم ممنوعة احنا ما في سيرة لهيك كتب و ما في طلب الها و ما بعرف و لا اي شخص شيعي ... فياريت الإخوة يدلوني على كتب بسيطة ممكن انزلها عالنت .... و الكم كل الشكر

[محمــــد]

طيب اخر مرة فتحي,,,و شوفي ااخر رسالة برسلها و رح يكون اخر تدخل مني و الله يهديكي الى ما يحب و يرضى

[** مسلمة سنية **]

المشرف حيدر القرشي .... مشكور كتير و ربنا يجزيك كل خير

[حيدر القرشي]

بخدمتكم وانا حاضر لكل سؤال واستفسار
وبخدمتكم وخدمة كل الموالين