[*أحمد الكعبي*]

تحيتي وودي لرحيق حرفكم


صلاة التضحيات أوياك صليت
گمت أذنت وحدي أبوكت الغروب
حيَ أعله الفراگ أبخدي خطيت
شنو شگالولك آنه صبري أيوب
مگص هجرك وأفصل بي معاناة
وأخيط بالدموع أثياب مو ثوب
شوديلك بديه الزيج شگيت
باد أمنلفراك وصار متعوب
صرت أسمع بهجرك بس تمنيت
وشايل بالعيون أدموع يعگوب
كله لخاطرك هيچ آنه سويت
يالهديت حيلي بسدت البوب
وآنه الچنت أظن منك تمرلي
فتت من باب بيتك ماصحتلي

[/CENTER][/CENTER]

[جودت الانصاري]

انت بيتك ميت ,, طابق
واني بيتي ,,, الف كصبه ,,
مسيس بنص الاهوار
وحتى ما عندي
جدار
لان كل الوطن بيتي ,, وانعم بحسن
الجوار
ومن اسافر ,,, عندي ستوته زغيره
وما يهمني حتى لو تملك
قطار

[ابو ظاهر البركي !]

تحية حب واجلال لأساتذة الادب

عجيبه شلون تسألني شعفتلك
هو انه شخذت حتى تركتلك
انا الماعندي كلشي انت الخذتني
وعجيبه وآني عندك ماشفتني
آني اسه ارد انشدك عني وارتاح
بعدني بجيب بالك لو عفتني؟
اذا نشدوني عني احجيك وبآه
لسه انت التجاوب لوبعتني؟
انا الردتك اضل وياك للدوم
اذن ردني لونك ماردتني
اذن ماعندي شي. وياك كلي
وانت لو عفت هم ماعفتلي


تلميذكم
ابو ظاهر البركي

[*أحمد الكعبي*]

[CENTER]

لا زلت أتنفس كل حرف من حروف اوجاعكم
السلام على أهل الوجع


عفتني بلوعتي مثل اليتامه
تموتهم الحرگه من يجي العيد
وعفتلي الدمع والهم والملامه
تجيني وي صفنتي أبلا مواعيد
مته ترجع يغايب بالسلامه
أحس بنار هجرك گامت أتزيد
عفتني أبلا جنح مثل الحمامه
بجنح مكسور تتعنه المشي تريد
كلشي أوياي ماعندك تگلي
غير الوجع والهم ماعفتلي

[/CENTER]

[سفينة البحار]

السلام على اهل الابداع
من اصحاب الوجع الجميل

عفتلك ذكرياتي الجانت تفوح
عبير .. وجانت باحضانك تنام
وعفتلي انت شعفتلي غير الجروح
بيه انت زرعتهن حقل الغام
ابد ما حسبت تنساني وتروح
صوجي وما نشدتك كلبك شضام
عفت كلبي بخناجر هجر مذبوح
عفته بين هم .. وقسوة ايام
ينوح ومن ينوح يسكت النوح
ابد مايوم يهده .. يهجع .. ينام
لون تدري بغيابك حالهه الروح
جلد ظليت بعدك لاف اعظام
انا الخليت كلي وانت كلي
لمن ما رحت شنهي العفتلي

نلتقيكم في وجع جديد "

[*أحمد الكعبي*]

الف سلام على أوجاعكم


عفتلي ذكرياتك سيف بچلاي
يلسعني بغيابك وأنته مرتاح
وعفتلي أهموم تعزف عالوجع ناي
وأزغر جرح بيه يّصيح أصياح
رسيت أبحر هجرك تايه الراي
أبوجه أشراعي عكست كل الأرياح
انه جناحك چنتلك وأنته بسماي
اليوگع من سماه مكسورله أجناح
وين الگه القضاة التحكم أبهاي
على الحطني بقبلته وصار ذباح
عفتني أمعلگ وماصحلي شَراي
وتعَذرني چفك عافني وراح
موسم زرعي مات بشحت الماي
وتعبي أيروح شفته لغير فلاح
حصدني والمناجل باشطه أوياي
وبقه سباح گاعي شابع أنياح
ياجناي لا تشلع شتلتي
غير أغصان مكسوره شعفتلي

[ابو ياسر الكعبي]

مازال الشوق متناثراً للنازفين جمال الوجع

نعم .. باحضاني باتت ذكرياتك
عكارب عشعشت ببطون الجروح
أنه ذاتي الوفه , والهجر ذاتك
كل ذِكره بغيابك جرح مفتوح
بيادر ظاملك كلبي .., وحياتك
أعلّيها وجِفاك إيهَدْمِ الصروح
وجم موسم وصل بالشوك فاتك
ولك بس إلك فكّت بابها الروح
وغَلاتك مَدري شنهو انت إبْغَلاتك
الوصالك مفرداتي اتسكّر النوح
كلَت روحي خناجر مُفرداتك
وتسألني إشعفتلك كبل لاروح
لأن انت حياتي وانت خِلّي
عِفتلَك من رحت روحي .., إشعفتلي
"
سأكون والوجع بانتظار الوجع

[ابو ظاهر البركي !]

لتراتيل اوجاعكم ينحني وجعي

اخذهن ذكرياتك شلي بيهن
بنص بالي واحسهن شتتنه
حتى جروحي لبدن من حجيهن
ازغر جرح عندي سودننه
انا ماريدهن يمته وتجيهن
تشوف شلون كلبي يجرحنه
انا جروحي البسهن عبيهن
لأن زيج العليهن شككنه
واسد حلوكهن خايف بجيهن
يفرح ذكرياتك خايف انه
انا توني جبتهن من سبيهن
يم كلبي الاخذته يعاتبنه
سبايه جروحي هودهن يخلي
وأنه وياهن الك .. انت شعفتلي



مازالت اوجاعي لأوجاعكم معاتبه

[ابو ياسر الكعبي]

الله الله يا ابا ظاهر
رائع بتمام الروعة
"

رجّعلي المضه والفات منّي
وآخِذ من مُهِجْتَك ذكرياتي
لأن صفنات هجرك سودنّني
وعلى إرموشي إذبَحَن كل امنياتي
وإذا جروحك سبايه مشن عني
غريب آنه إسْلِبوا جِثّة حياتي
عيون جروحي بالدم غسّلني
أنه الميّت كبل ساعة مماتي
إنحنه شجرة حزن عالكبر ضلّي
لأن غير المواجع ماعفتلي

سأكون بانتظار وجعٍ جديد

[مسفر]

قال الشاعر


دقـات قلب المـرء قائلة له

إن الحياة دقائق وثواني

فارفع لنفسك قبل موتك ذكرها

فالذكر للإنسان عمر ثان