[زهرة الفردوس]

.. زينب تلطم على الراس ..

زينب تلطم على الراس وتنادي يا مهر حسين
أسمع هول بالميدان خيالك تگنطر وين

لزمت بيديها لجامه وگامت تون وتنشده
مالك تسحب عنانك ومنك مايلة العدة
يا مكدر وين أخويه حسين خليته شبب وحده
شعندك موجب گبالي
وتتهضم على حالي
تراك مرتت دلالي
أسمع بالمعارى صياح والعسكر فزع صوبين

من شفتك علي مجبل گلبي إنخمش وإتطير
أسمعك تصهل وتعوي لچن بالعويل الشر
سولف لي أخيي وين عنك وگع وتگنطر
إمشي وياي دليني
ولعند حسين وديني
شمالك ما تحاچيني
تدگ بحافرك يمي وشابح للخيم بالعين

يا مهر حسين حاچيني گاصد هالخيم ليها
ولأسبالك زلم ظلت تحشمها وتنخيها
غير الحرم والرضعان ما تم هالخيم بيها
بس واحد بگى وجعان
جسمه من المرض نحلان
أبوه بحوطة الميدان
علينه ضاعت أخباره ولا نندل طريجه منين

ما أدري شعوگك عني وهاي الخيل إجت لينه
خاف تفرهد خيمنه وتفرهد عز إلي علينه
خذنا وياك للميدان وعلى حسين دلينه
وكل الحرم تبعنه
وبيهن للولي تعنى
سمعن من بعد ونه
صوت يصيح يا زينب يختي طالعة لاوين

سمعت زينب وركضت وگامت تركض النسوان
لمن وصلن الحومة ولگنه موسد التربان
يلوج من العطش ويصيح وحگ جدي النبي عطشان
يا هالوادم درحموني
شربة ماي دسگوني
بعد ما أشوف بعيوني
وگامت عالوجه تلطم وتخمش زينب الخدين

تدنت زينب وگامت تجلب جروح إلي بصدره
لنها تشوف المثلث طالع من حرز ظهره
گامت عالوجن تلطم وتسچب زينب العبرة
تگله ويل گلبي عليك
يا خويه هالسهم ماذيك
تلوج على الثرى مخليك
وهو إلي گطع حيلك وجاسم چبدتك نصين

زينب گاعدة يمه وتگلب جروح إلي بچبده
يا حيدر چان مگصدها تطلع السهم وتشده
لن الشمر يا كرار لازم مرهفه بيده
ولمن وصل گامت ليه
وتتوسل يا حيدر بيه
تگله لهالحرم خليه
ما تم بيه كتر سالم حط سيفك يا مكدر وين

(الشاعر المرحوم عبد الحسين الشرع )

[زهرة الفردوس]

بسم الله الرحمن الرحيم...
السلام عليكم ورحمة الله وبركاته...
مسلم حاير ظل بالكوفه مسلم حاير
ريتك حاضر يابو الحملة ريتك حاضر
مسلم حمل لوعات يالتحضر الشدات
ريتك حاضر يابو الحمله ريتك حاضر
........................*
ابجرح كلبي وجفن مافارك المدمع الك اشرح مصيبة مسلم وتسمع
مصيبه ومن حزنها الطود يتصدع امن الكوفه بعد ياعلي اشتتوقَّع
مصيبه ولو ردت اذكرها يالأنزع أخاف اعليك اخاف الطبره تتوسَّع
تلهب ناري امن اذكر مسلم تلهب ناري
وهاي اعباري تفيض وتنزف هاي اعباري
واشتنفع العبرات يالتحضر الشدات
ريتك حاضر يابو الحمله ريتك حاضر
....................................
عله الموعد وصل مسلم يبو السبطين للكوفه وتعنَّه بأمر من حسين
عكب ما بايعوا نقضوا عهود الدين لصوب الظالم ابن ازياد منجرفين
ومسلم ظل وحيد وظل يدير العين ما يدري يحيدر يتجه لا وين
نكروا عهده اهل الكوفه نكروا عهده
كلهم ضده شاف الوادم كلهم ضده
وانعقدت الرايات يالتحضر الشدات
ريتك حاضر يا بو الحمله ريتك حاضر
........................*
بالكوفه واهلها مسلم اتحيَّر مايدري النتيجه اشلون يا حيدر
كعد يم دار طوعه الحره يتفكَّر وابحسرة كلب مجروح يتحسَّر
ابدلاله مواقد ضيم تتوجَّر يفت صم الصخر هالحال والمنظر

شافت طوعه حالة مسلم شافت طوعه
نار اللوعه ابكلبه استعرت نار اللوعه
يومك جزاه وفات يالتحضر الشدات
ريتك حاضر يابو الحمله ريتك حاضر
........................*
طوعه تنادي ومنها الكلب مرتاب شنهي وكفتك يا هذا يم الباب
امنين انته ولعلَّك من بلد اجناب لنها تستمع من ابن اخوك اجواب
غريب آنه يكلها وما إلي اصحاب أريد الماي ضامي واحس كلبي ذاب
بس هالمطلب منج عندي بس هالمطلب
ماي ارد اشرب وآنه الضامي ماي ارد اشرب
أشرحلك المأساة يالتحضر الشدات
ريتك حاضر يابو الحمله ريتك حاضر
........................*
لمن شرب منها الماي ظل محتار لنها اتناشده اشعندك اباب الدار
تتلفَّت أشوفنك يمين ايسار جنك ما الك لا أهل لا أنصار
جاوبها يحرَّه أهلي ناس اطهار عقيل الوالد وعمي علي الكرار
أريد اتعذر لا معرفتك أرد اتعذر
عمك حيدر صيح وحشَّم عمك حيدر
وإصرخ يبو الكلفات يالتحضر الشدات
ريتك حاضر يابو الحمله ريتك حاضر
........................*
لن طوعه تكلَّه وأدت المعروف هاي الدار دارك واعتبرنه اضيوف
إدخل بيها امن لا يمسَّك خوف ولمن بزغ وجه الفجر لنَّه يشوف
دار الحرَّه طوعه طوكتها اصفوف طلع والكوم حاطوه ابحجر وسيوف
عكب الهمه وسفه اتيسَّر عكب الهمه
وذابوا جسمه من قلعتهم ذبوا جسمه
وبالغربه مسلم مات يالتحضر الشدات
ريتك حاضر يابو الحمله ريتك حاضر
((تمت بعون الله ورعايته))
ونسألكم الدعاء من القلب بتعجيل الفرج وبراءة الذمة...

[زهرة الفردوس]

.. سواد الليل ..




حرم عندي - وحگ جدي
سواد الليل إمهلوني

طلع من خيمته المظلوم طلع للحومة ينظرها - مثل موج البحر هاجت جحافلها و عساكرها
وادم لا شرف لا دين باعت كل ضمايرها - طلع رايد أمر توديع من عدها ويذكرها
وگف غاضب - بده يخاطب
يمن للبيعة جبتوني

وگف بين الجمع يخطب إجت إلمن جحافلكم - يا شيعة بني سفيان أريد أحچي و أسايلكم
انتوا إلي بعثتوني طلبتوني برسايلكم - شنهو إلغير الأوضاع شنهو إلجرى شبدلكم
الكتب تشهد - صفت مسند
تگول إنتوا طلبتوني

نادى يا إبن ربعي ويا حجار إبن أبجور - يا قيس إبن الأشعث هاي رسايلكم و هاك أنظر
كتبتوا نبايعك يا حسين و أطلب يا أمر تأمر - و لو ما تحضر بهالحال من بعدك يمسنه الضر
العهد وينه - و مضامينه
خصم تالي جعلتوني

يا شيعة بني سفيان ليش مجردة الأشفار - جدي المصطفى و أمي الزهرة والدي الكرار
ما أريد بسبب دمي تدخلون لسعير النار - إذا ما چان عدكم دين عيشوا بالدهر أحرار
إجيت أعزل - و أريد أسأل
طلب عدكم تطلبوني

ﮔـالوا نعلم بجدك الهادي و فاطمة أمك - لچ بغضاً لبوك نريد نسفك بالحرب دمك
و نخيرك بين ثنين لو تخضع لإبن عمك - لو تنزل لميدانك وتعرض للحتف جسمك
شجاوبكم - شعاتبكم
عرفتوني و خذلتوني

إدفعوا نقمة الديان و إجتنبوا ذنب چتلي - إنطوني من الأرض مأمن أروح بضعني و بأهلي
لو أرجع لأرض يثرب وعنكم ينتقل رحلي - هالسبعين ألف ما أريد تدخل سقر من اجلي
خذلتوني - إتركوني
أعود لطيبة بضعوني

إذا ما حصلت الرخصة منكم يا بني سفيان - إمهلوني سواد الليل أودع الأهل و الرضعان
و باچر كل كتايبكم خل تجتمع بالميدان - مطلاع الفجر فاصل بين الكفر و الإيمان
سفك دمي - لون حتمي
أودع العيلة خلوني



كتابة ( محمد )


للإستماع :-

http://www.althqlin.net/sounds/playmaq-1677-0.html

[زهرة الفردوس]

.. ظل يجري دمع العين ..




ظل يجري دمع العين - عالراية و الچفين
جودك ما لگيته - و لظهري حنيته
عالراية و الچفين

عباس إجيتك للنهر
ودموعي تجري - حاربني دهري - و حايرة بأمري
نار الظمى ونار الخيم
تلهب بصدري - شيطفي جمري - و حايرة بأمري
سلبوا خدري وما أظن
تعلم وتدري - من عگب خدري - و حايرة بأمري
ما تدري يا عباس صوبني سهم البين
صك عيني وعماها - وضلوعي حناها
عالراية والچفين

يا با الفضل جمر الگلب
يسعر لهيبه - بنار المصيبة - وآنه غريبة
بدرك يا خويه على النهر
أصبح مغيبه - وجثتك سليبة - وآنه غريبة
بغيبتك غابت عزتي
وخدري شيجيبه - ما بگت هيبة - وآنه غريبة
بين السلب والنار عفت الجمع صوبين
وآنه بهضم گلبي - جيت وعيني تربي
عالراية والچفين

عفت الخيم متلاهبة
وجيت أرد أحشمك - وأگعد وأكلمك - خليني يمك
بيا عين أشاهد مصرعك
وأنظر لجسمك - مخضب بدمك - خليني يمك
دمك أمزجه بدمعتي
وهمي ويا همك - بگلبي أضمك - خليني يمك
گلبي إنفجع وإنصاب هاي المصيبة منين
يا لوعة عذابي - جيت أعرض مصابي
عالراية والچفين

عباس إجيت بشيمتك
وإنت كفلتني - تالي فجعتني - رحت وعفتني
إنت إلحديت بناگتي
وللطف جبتني - ليش تركتني - رحت وعفتني
عذبني دهري بغيبتك
يل عذبتني - من فارگتني - رحت وعفتني
بفگدك فگدت الراي هالمحنة چانت وين
ما أوچد بعيني - منهو إليدليني
عالراية والچفين

محتارة يم المشرعة
ايدي على خدي - بالغربة وحدي - ولا والي عندي
يا با الفضل نار العطش
فطرت چبدي - وجروحي تدي - ولا والي عندي
عاهدت أوفي بالصبر
وحفظت عهدي - وبذلت جهدي - ولا والي عندي
وبغيبة الوليان وين أتجه لاوين
حيرني زماني - ومحنية تراني
عالراية والچفين

عباس ما تخمد بعد
جمرة غليلي - ولهفة دليلي - لا يا چفيلي
تهدمت أركان الصبر
وإنهدم حيلي - وفاجئني ليلي - لا يا چفيلي
يا گمر هاشم مصرعك
فجر مسيلي - و گرب رحيلي - لا يا چفيلي
يا با الفضل وياك موتي گرب هالحين
من لوعتي وهمي - تهدم ركن عزمي
عالراية والچفين

تگدر ترد لي عزتي
لو چتفوني - الگوم وسبوني - وعنك خذوني
منهو إليعدل محملي
ويكفل ضعوني - لو يسروني - وعنك خذوني
أعتب عليك بونتي
ودمعة عيوني - عگبك ولوني - عنك خذوني
حادي الضعن لو شال وإحنه بيسر ماشين
من جانب المحمل - أتلفت وأسأل
عالراية والچفين



كتابة ( محمد )


للإستماع :-

http://www.althqlin.net/sounds/playmaq-1679-0.html

[زهرة الفردوس]

.. هايم بحبك ..



هايم بحبك أنا يا إبن الزچية - وما أزل عن حبك ليوم المنية
بعد داري لا يهمني ولا يهمك - ليل ونهار إنت يمي و آنه يمك
يا چتيل الغاضرية

آنه بمحبتك هايم خل تلوم أهل الملامة
حيث حبك بدليلي چالگمر سيطر نظامه
جسمي عنك لو تبعد روحي ظلت چالحمامة
هاك أخذ من العهد بالمية مية - لو يگطعوني يا إبن حامي الحمية
عن محبتك ما أميل وصوتي بإسمك - أنهج وصار على شاشة گلبي رسمك
يا چتيل الغاضرية

منشغف بهواك گلبي ومالي غيرك ياالهواي
طينتي إنعجنت يا ابن حامي الحمى بماي الولاية
وإسلكت مسلك رضاك وصرت بدروب الهداية
وحققت آمال گلبي و هاي هية - وللمحب محبتك أعظم عطية
أي وحگ رب إلرفع عنوان جودك - نجحت آخرة و و دنية بسر وجودك
يا چتيل الغاضرية

و الخصم ظن عنك آنه لو أصد و يبعدوني
بعد راح أنساك لكن دارك بشحمة عيوني
حبك بدلالي زاد و هالعداة خل ينظروني
و أرجع لروضتك بإسم الله ونبيه -يل تشع روضتك چالجنة الزهية
وأشچي بالجار وجرى و أنظر لـﮔبرك - ليلي ونهاري أنه أكون أحيي ذچرك
ياچتيل الغاضرية

روضتك عرش الجلالة لچن مبنية بإرادة
عالأرض والكون يعلم هاي لك أعظم سيادة
روضتك كعبة الوفاد وشرف لأهل السعادة
روضتك نور ويشعشع للثرية - روضتك يا حسين آية على الوطية
روضتك مرآة تعكس لينه عزمك - روضتك نور المحب نار على خصمك
يا چتيل الغاضرية

روضتك كل إلگصدها أبد ما تخيب ظنونه
كلمن لروضتك ينظر دمع يهمل من عيونه
حيث يتجسم مصابك جمر حزنك ما يهونه
يذكر مصاب إلجرى بالغاضرية - عگب عينك وش بدى من أهل الردية
عالترب بين الأعادي طاح جسمك - لچن اليوم الحشر ظل خالد إسمك
يا چتيل الغاضرية



كتابة ( محمد )


لإستماع :-

http://www.althqlin.net/sounds/playmaq-1674-0.html

[زهرة الفردوس]

.. ( نعي أبوذية ) ..



رسالة حزن منهو إلي يوادي
للي گال قدمي لي يوادي
أنشدك وآنه محتارة يا وادي
الطفوف شگد شفت منك أذية


لإستماع :-

http://www.althqlin.net/sounds/playmaq-1675-0.html

[زهرة الفردوس]

.. هذه كربله ( موال ) ..


هذه كربله جينه ووصلناها - ووصلنا وكل مصارع أهلي شفناها
بس ما وصل بينه الحادي لأرض الطف - تذكرنه الجسوم إلسالت دماها
وإنعادت علينه مصيبة الوليان - يوم إلهوت عالغبرة وفگدناها
وذكرنه الأكبر إلي طاح عالغبرة - وسيف إلصوبه ولدمومه أجراها
وذكرنه جاسم العريس والزفة - وچفوفه بمسيل دماه حناها
وبهذا المكان إنذبح عبد الله - ورگبته بسهم غادر حرملة رماها
وهاي المشرعة ومصرع گمر هاشم - وذكرنه السهم لمن عينه طفاها
هذه كربله ومصرع أبو السجاد - وگطعة منحره الدامي ذكرناها
وبهذا المكان إنهشم صدر حسين - وبهذا الكتر جثته لگيناها
وهنا هجمت الخيالة عالأيتام - ونار الخيم محد إجه وطفاها
ما ننسى المصيبة إلي جرت بالطف - أهلنه تذبحت وشلون ننساها


كتابة ( محمد )


للإستماع :-

http://www.althqlin.net/sounds/playmaq-1678-0.html

[زهرة الفردوس]

.. يل عايش بوسط الروح ..



يل عايش بوسط الروح يا ساكن صبي عيني
كلما يتيهني الظيم يم جسمك يلاگيني

صحوة أجل يا جسام صار العمر يا وليدي
شفرة مصابك بالنوح ذبحت مسرة عيدي
ومناثر سهام البين أشگف رميهم بيدي
يا وليدي ما غير الآه بفراگك يواسيني

ما شفت گبلك عريس يتحنى من دم نحره
و أهله و عمامه زفوه بالنايحة و العبرة
عرسك يا سلوان الروح دوهني بالطف أمره
أنحب و أحن لفرگاك و آنه السقم باليني

يا جاسم شلون تغيب عن النواظر شمسك
وشلون صارت أحزان ليلة محافل عرسك
صبي عيني مدفون وياك و بنايباته يحرسك
و آنه إلصفت بنت الدوح تاخذ مرامي ونيني

هيجني يبني بفرگاك حزني وتمزگ صبري
عگبك تبلاني الظيم فرهد ملاحة عمري
سلمني جور الأيام يبني لضراوة دهري
بعدك يصبحني النوح و النايبة تمسيني

يتلاهبن بين حشاي من كل كتر نيراني
وآنه بدمع دم يسيل أخمد جمر أحزاني
چم فاجعة چم مصاب جور الوكت راواني
وما أدري شتشوف العين وشرايح يراوني



كتابة ( محمد )



للإستماع :-

http://www.althqlin.net/sounds/playmaq-1680-0.html

[زهرة الفردوس]

.. يا عين جودي ..




يا عينُ جودي - فوقَ الخدودِ
ثُم قولي عِندَ المسيلِ - السلامُ على الكفيلِ
يا عباس

لو تنشد عن أول زاير بالناس - راح وگصده ينور زيارة عباس
گول حسين إلفات على الموت وداس - وعن الشاطي زال جيوش الأرجاس
راح وشاف عضيده بآخر أنفاس - من سهم العين ومن عامود الراس
بالدمعة وبالآهات - حاير يجذب حسرات
وهو ينادي - هامَ فُؤادي
بالثبورِ وبالعويلِ - السلامُ على الكفيلِ
يا عباس

آنه حسين وإنت المفزع لحسين - عگبك وين أطلع وأتوجه لاوين
يا عباس كسرته لظهري هالحين - شلون عيوني تشاهد سهمك بالعين
وتشوفك متوذر بسيوف البين - ولا ظل جود ولا راية ولا چفين
وبصرخاتي ناديت - يمك أنحب ظليت
كسرتَ ظهري - وضاقَ صدري
يا قتيلاً وإبن القتيلِ - السلامُ على الكفيلِ
يا عباس

حيلي تهدم لمن شفتك مطروح - من عيني دمك والمدمع مسفوح
يا عباس إغفى بدلالي المجروح - لا مدمع ينفع من بعدك لا نوح
لعيالك ما ظلت مهجة ولا روح - جفن الأطفال لدربك ظل مشبوح
ما رادت منك ماي - تريدك ترجع وياي
والدمعُ جاري - من الصغارِ
كيفَ تخبو نارُ الغليلِ - السلامُ على الكفيلِ
يا عباس

يا زهرة عمري ويا سلوة دنياي - لا تبگى موسد گوم إرجع وياي
يا عباس ودمك أغلى من الماي - تشمتت بيه الناس وفرحانة عداي
وبگطعة يمناك إنگطعت يمناي - مدوهن من بعدك لا فكرة ولا راي
إنهض يا خويه وگوم - لا تشمت بيه الگوم
أنت البقايا - من الضحايا
كيفَ تدنو من الرحيلِ - السلامُ على الكفيلِ
يا عباس

محني على العباس ولن عينه تشوف - فاضت روحه وحلت لوعات الخوف
رايد يسبل ايده وما عنده چفوف - عود لخيامه بدلاله الملهوف
وعياله تلگنه بمدمع مذروف - شافن رد حسين بوجهه المخطوف
صاحن كافلنه وين - راجع وحدك يا حسين
أين المجيرُ - أين النصيرُ
يا لهُ من خطبٍ جليلِ - السلامُ على الكفيلِ
يا عباس

أطفال على حسين إنجمعت وعيال - بدموع وآهات ولوعة وأهوال
صاحت والمدمع ويا الدم همال - وين لكافلنه خليته بيا حال
ما يعلم رضع تنتظره وأطفال - جاوبهن خليته بحجر الآجال
زينب تعثر وتگوم - وتحوم على المظلوم
وهي تقاسي - تِلكَ المآسي
ثُم صاحت يا عينُ سيلي - السلامُ على الكفيلِ
يا عباس

حسين يصبرهن وبگلبه الأحزان - جمع أطفاله وراح على الرضعان
ظل يعصر دمعاته بچف الأشجان - يريد يروي كل عطشانة وعطشان
ودع كل عياله وعاف الصيوان - سل سيف الموت وگاصد للميدان
يخوض بساحات الموت - للشاطي يصيح بصوت
في الحربِ وحدي - ليتكَ عندي
خُذ سلامي مع الصليلِ - السلامُ على الكفيلِ
يا عباس




للإستماع :-

http://www.althqlin.net/sounds/playmaq-1673-0.html

[زهرة الفردوس]

.. يا مهدينا ..



يا مهدينا أدركنا - باللهِ لا تتركنا
قم وإهتف الثار الثار
يا مهدينا أدركنا

يا المهدي طالت غيبتك وإحنه بأمل ظلينه - ملينه من كثر الصبر يا بن الحسن ملينه
بالهضم والهم والحزن والمحن لا تخلينه - نصرخ بصوت الفاجعة بدرك الغايب وينه
يا عالماً ما فينا - نارُ الغظا تكوينا
من يطفئ النار النار
يا مهدينا أدركنا

دنيانه صارت مظلمة وننتظر طلعت بدرك - يا وارث آدم بالعلم كنز العلوم بصدرك
أيوب مثلك ما صبر والصبر مل من صبرك - يا عصة موسى وحكمته يا شبه نوح بعمرك
يا وارثَ الزهراءِ - بالحُزنِ والأرزاءِ
يا بن الهداة الأطهار
يا مهدينا أدركنا

يا محنة ننسى ويا هضم ننسى مصاب الزهرة - لو ننسى وجه المرتضى تخضب بدم الطبرة
والحسن بالسم إنغدر وبگلبه تسعر جمرة - لو ننسى وقعة كربله شحل وجرى على العترة
خيرُ الورى وا لهفي - قد قُوضوا بالطفِ
ندعوا بدمعٍ مدرار
يا مهدينا أدركنا

يا المهدي هذه كربله جدك إخذ أخباره - حاير وگف بين العدى ينظر جثث أنصاره
قدم الأكبر ضنوته وبالچبد تسعر ناره - ومن طاح الأكبر عالأرض طاح وتهدم داره
نفسٌ أبت إذعانا - حتى قضى عطشانا
الحزنُ أفنى الأعمار
يا مهدينا أدركنا

هيهات يا بن العسكري نبطل النحب والونة - وجسام ليلة زفته بدم الوريد تحنه
عريس وسيوف الحرب عالمعركة زفنه - ووذروا جسمه على الثرى بدال العرس والحنة
لما قضى منحورا - للكون أضحى نورا
يا خاتماً للأنوار
يا مهدينا أدركنا

يا المهدي صورة نايبة بدمع الجفن موصوفة - أروي لك أخبار المحن من دمعتي المذروفة
من وگع عمك عالنهر يا المهدي ليت تشوفه - بالسهم عينه مصوبة گطعوا الگوم چفوفه
قد فارق الأنفاسا - فلندعوا وا عباسا
قد غابَ بدرُ الأسحار
يا مهدينا أدركنا

يا المهدي أصعب كل وضع تفت الصخر آلامه - من برز جدك للحرب عاف الحرم وأيتامه
ساعة ورجع بس المهر يصهل لصوب خيامه - ينادي الظليمة والسرج خالي ويجر لجامه
الثأرُ واغواثاهُ - حاشاكَ أن تنساهُ
يا إبن الأباة الأطهار
يا مهدينا أدركنا



للإستماع :-

http://www.althqlin.net/sounds/playmaq-1671-0.html