للكوفه مسلم راح ... جل غايته دينه
هذا سفير حسين ... أصبح أسير البين
وين العهد وينه
****************
للكوفه مسلم من وصل ... الكوفه خرجت ... لمسلم تعنت
شيوخ وشباب أتجمعت ...والبيعه أنطت ... لمسلم تعنت
أنطت البيعه والعهد ... من خلفه صلت ... لمسلم تعنت
ومسجد الكوفه اليوم ... فاض بمصلينه
مسلم يأم الناس ... وتصلي خلفه أجناس
وين العهد وينه
****************
من بعد كل ذاك العهد ... وذيج المودة ... أتعوفه وحده
ولا واحد الخلفه سجد ... ولا وصل حده ... أتعوفه وحده
وذيج الجموع أتفرقت ... مسلم أبشده ... اتعوفه وحده
بالكوفه ماله معين ... فاضت دمع عينه
إلمن يروح اليوم ... وأتفرقت هالكوم
وين العهد وينه
****************
بالكوفه مسلم خارجي ... هو والحسين ... ينطي الوجه وين
بوجه البيوت أتسددت ... بس تجري العين ... ينطي الوجه وين
بس هاني لمسلم صفه ... أويوفي الدين ... ينطي الوجه وين
وطوعة فتحتله الباب ... وبالكلب نارينه
تكلي بعلي الكرار ... خانت الكوفه أمرار
وين العهد وينه
**************
وجيش آل أميه أنتشر ... ويحاوط الدار ... ومجرد الأشفار
وتذكره طوعة تشـجعه ... بعـمه الكرار ... ومجرد الأشــفار
صمصامه بيده من طلع ... ميهاب الأشرار ... ومجرد الأشفار
ومسلم يكر عل الجيش ... فارس يعرفونه
والكوفه أزغار أكبار ... تضربه بعصي وحجار
وين العهد وينه
****************
لبن الدعيـه ودتـه ... مســلم ميسـر ... هذا المكدر
بالحجر أدمو شفته ... وكطعوالمنحر ... هذا المكدر
ويرموه من فوك القصر ... وبالحبل ينجر ... هذا المكدر
وينه اليصل لحسين ... مسلم ينادينه
ويكله عفت أثنين ... بالحبل مسحوبين
وين العهد وينه
ــــــــــــــــــــــــــــــــــــــــــــــــــ ـــــــــــــــــــــــــــــــــــــــــــ
قاسم طاهر القاسمي .. 1433
للكوفه مسلم راح
العرض العادي
