[زكي الياسري]

الى عزيزة الحسين سكينه .. اهدي هذه الابيات راجياً شفاعتها يوم الورود .. لي و للقراء الاكارم

سكــنه التقيه ... صارت ســبيه

حيف الدهر جار و هظم بنت الزجيه

سكنه العزيزه ابكربله

صارت سبيه

--1--

صرح العقيده امن انبنه ++ واتثبتت عمدانه

بسم الله دكـَ ساسه النبي ++ وحيدر رفع صيوانه

لاجن بعد سم الحسن ++ من زمرة الخوانه

ينهار راد المعتقد ++ واتضعضعت اركانه

يحسين

وحييته بيدك .. وبدم وريدك

يا والدي بدمك حيت هاي العقيده

من مثلك الاجل الشرع قدم وريده

وبنته الوفيه ... صارت سبيه

سكنه التقيه ..

++2++

يا بويه عني من غبت ++ شب الجمر دلالي

وتيتمت كبل الاجل ++ من فركَتك يالغالي

وشلون احمل غيبتك ++ يا بويه وانته الوالي

يا عمه زينب هل الم ++ حطم جميع امالي

زينب

يا عمه زينب .. دلالي يلهب

باجر يعمه ننسبي بدرب الرزيه

باجر علي وطاهه النبي وامي الزجيه

تنصب عزيه ... صارت سبيه

سكنه التقيه ..

++3++

زينب تجاوبهه ابألم ++ بعبرة حزن مرسومه

وتكلهه يا بنت الاخو ++ هالفـــــاجعه محتومه

شاء الله احنه ننسبي ++ والدين احنه انجومه

هالدنيه مو دار الخلد ++ كلمن يروح ابــيومه

آآآآآآآآه

حكمه ودرايه .. طلعتنه هايــه

يا عمه وادموع الحزن فجَّـــر بحره البين

ضميهه يا سكنه ذخر عمه لمصاب احسين

دمعج هديه ... صارت سبيه

سكنه التقيه ..

++4++

ونيت كل ونه جبل ++ شحمل يعمه ياهم

فركة علي الاكبر اشد ++ لو من افارك جاسم

لو فكد عبد الله اشد ++ وبمهده كلبي محزم

لو بُعد عباس الشهم ++ ياعم شبيه ياعم

لعبـــــاس

عبراتي تجري ... بحزانه صدري

يا عمه انساهم جذب يا عمتي هيهات

راح اكَضي ساعات العمر يا عمه بالونات

ونتي الشجيه ... صارت سبيه

سكنه التقيه ..

++5++

شب جمرتي اوداع الاهل ++ وتهدمت اركاني

يا عمه اسِلم للقدر ++ مكَــــــــــــدر اســلم اني

كربله الشبت جمرتي ++ وزادت حطب اشجاني

بيهه انتهت كل فرحتي ++ بيهه ابتدت احزاني

احزااااان

بيهه الصوارم ... تفني الهواشم

بيهه الكمرعينه بسهم يا عمه يطفوهه

و جفوفه يم ماي النهر يا ويلي كَطعوهه

بعد المنيه ... صارت سبيه

سكنه التقيه ..

++6++

يوم الموادع بالكلب ++ حسيته ساكـــت نبضه

وشلون افاركهم عُمُر ++ ميته ان عفتهم لحظه

يا عمه ويـــاهم ردت ++ ميــــته بمامتي ارضه

ولا ابكه مشدوهة فِكر++ بالليل طوله وعرضه

اهآآآآآآآآآآآت

ابكَه ابدربهم .. انطر خبرهم

نذراً لون ردوا الي من الحرب طيبين

ازرع طريقج كربله ورد و رياحين

نذري وعليه ... صارت سبيه

سكــنه التقيه

تمت بعون الله ... زكي الياسري النجفي

3 محرم 1431 كيل