[والي مطر]

شلونك انته ياعراق
صدك صار الماي البيك مايجري
وضل دمى الطيبين برضك أنهر يراق
شلونك انته ياعراق
وصدك صار الذبح بيك
ونشفوا ماي العيون
ذولي اشباه الرفاق
شلونك انته ياعراق
أحجيلي عن قبه امامي الفجروه
وحجيلي عن جثة طفل
تمزقت أو مالكوه
وحجيلي عن مجرم أهل الدجل كبروه
وي كُبره هدم اسوار الزقاق
شلونك انته ياعراق
وحجيلي عن عروس تلطخ الثوب العليها
بدما نزفك ياوليها
هم تجيها هم تجيها
الفرحه ضاعت من أديها
وفرهدوا كل العليها
من صفروا حان السباق
شلونك انته ياعراق
حجيلي عن دمع العيون
هم يوم فاركه لجفون
وانته الفجروا بيك لطنون
أوأرضك أصبحت أرض الجنون
من لفوك معلمين أقوال النفاق
شلونك انته ياعراق
حجيلي عن تابوت حزنك
الحطموه
من لمو طفل مفجور
وجردوك وما لكوه
ومد أديه الجفن
بلكي يمه وسدوه
ورد ربط حزنه ويحزنك
أشابكن ردنه ويردنك
وشكد جميل الملتقى
من يزخرف بصوت العناق
شلونك انته ياعراق
كافي ما نحجي بعد ونزيد الجروح
كافي خل نسلق أني وياك
أحجار السفوح
أني جسمي بعطرك من مهدي يفوح
اني نفسك وانت روح
أنا أبن أتراب ارضك ياعراق
وشما ضيقوا بيني وبينك
مسافات الخناق
تبقى انت دمي ياعراق
وانا دمك ياعراق



والي مطر

الخميس 12-11-09