[احمد العراقي]

يا بسمة املنه

يا بسمة املنه الـ دوم نحچيها
ويا اصل الحياة وكل معانيها

امااني اگلوبنه انت الما تمل طاريك
ولهه اگلوبنه وتسلى بامانيها

ينبع اعمارنه ويا سچّة العطشان
روح الضاف عدها ابصبر ترويها

ينسمة خير نسرح من علينه اتفوت
نغفه ابطيبها ونفرح انّاغيها

مثل لهفة ليالي لومضة النجمات
ومثل شوگ الجروف لماي يسگيها

ومثل حال الوحيدة التربى عين الغاب
عليك ارواحنا ابكل حين تلگيها

غربة احنه ابغيابك والعمر مجهول
والمجهول عمره اسنينه ناسيها

تچلّ اجدامنه وسجتنه ما تنشاف
بداية وما عرفنه اشوكت تاليها

ثگَل جفن انتظار اعيونه ومن طاح
يبس بيها الدمع وانغلگ جاريها

يغصّ الشوف بيها امركده ابلا كيف
وبيابيها اعله دربك جمر تبچيها

لچنها اعله البصيص الزام عزمه اوياك
لوَت شوكة دهرها وخسر عاميها

ضعنه ابموج .. مركب خامل المجداف
وفزعة حيلنه اتعرگلت رجليها

يطر بينه ابحر دنيا ابنوال الخوف
نظل تريدنه وايّست نگضيها

هندس ليلنه وكلفه الضرير ايعيش
باحضان الليالي النور ما بيها

ضراير نرتجيك ويرد بينه الحيل
ونرد وجه الشمس يزهي ابمعاليها

ابغزِل چف الصبر شدينه حيل الروح
ابعدى درب انتظارك ما نخليها

يعت بيها الجزع ويريد ما تحويك
مل منها وجزع ما گدر يحويها

حوت نفسك نبض حي بيه نفسها انعاد
بعد الموت الاحمر صار حاييها

زرعنه اگلوبنه اويَ ارواحنه ابدمعات
طرّت بالمتانه ويمته تحويها

فرجنه انت او وعدنه او حظوة الايام
يمهدي جروحنه ابطلعتك تشفيها

احمد العتابي
العراقي