[عادل الناجي]

الحجر ما عنده غيره وأني اگلك ليش
لأن طگ الحسين بكربله براسه
الفرات ابلايه گصه واني اگلك ليش
لأن ما فزع لمن طاح عباسه
السوط ابلايه ذمه الشالته الكفار
لأن طگ الخدر ما دنگ وباسه
الخيل ابلا ضمير الهبت اعله حسين
لأن داست بصدره وخنگت انفاسه ؟؟؟
أعتب عالحديد القبل يصبح سيف
ويقاتل حسين المحد ينصره
واعتب عالشجر چا وافق يسون
من عنده النبال النامت بصدره
واعتب عالطيور الغمضن العيون
وابو السجاد صاحي يلوج عالغبره
واعتب عالنجوم البقن مرتفعات
وما نزلن يواسن فاطمه الزهره
واعتب عل سمع قصة ابو السجاد
وما نزلت دمعته وخنگته العبره
واعتب علي يعرف خوت العباس
ويخون العراق وينكر العشره؟؟؟
أشوفك يا وطن ما تفرق اعله حسين
هم مظلوم مثله ومحد يعينك
خاطبت السيوف اخذني يالله بساع
لجل دمك يسيل ويستقم دينك
أنته الغيرتك من غيرة العباس
وذ الفقار باقي السيف بيمينك ؟؟؟
يظل مرفوع راسك يا وطن الامجاد
وتظل وسط المجد مكتوبه سالفتك
صح انته جروحك بيهه كومه اجروح
وصحيح اجروح جرحك حيل مالمتك
لچن تبقه العراق الما يرد خطار
وغصبن عالچفوف اتبوس بسلتك

اعذروني سوف اغيب عنكم لفترة من الوقت
تحياتي اخوكم عادل الناجي