[قاسم حتروش]

هذه القصيد تقرأ بنفس طور قصيدة (( كل ما أشوفك بالطيف ))
التي قرأها المبدع الحاج باسم الكربلائي




مـــا بــيــن أيـــد العدوان ** ضــلـيـت أنــه بلا خوان

بـطـف كـر بله عافوني
كلبي بحزن مملي جروح ** وساعة نزع مني الروح
تـمـنـيـتـهـم حضروني
*********
من صغري عاشرت الحزن * ما نشفت دموعي وأون * ولا واحد يسكّن ونيني
عمري كضه هم وألـــــــــم * مـــا شفت راحه ونلجم * كلبي مــن أول سنيني
أول مصاب اللي جــــــره * جدّي رحل خيــر الوره * نبع الرسالة وأصل ديني
وما أنسه يـــوم أم الحسن * ومحسن أخويه المؤتمن * لجلـــــه دم دموع عيني
وحيدر علي داحي الباب ** هامه أنطبر بالمحراب
وبطبرته يتموني
وجبد الحسن طشته يلوح ** وساعة نزع مني الروح
تـمـنـيـتـهـم حضروني
********
بصبري شلت هاي المحن*لاويت نكبات الزمن*ونــــــار مستعره بدليلي
كل نكبه بيها تهد صرح* اسهر وياها للصبح*وتحرمني من غفوات ليلي
ذبلن عيوني من السهر*ودموعي يتجارن مطر*بكــــــل مسه هذا سبيلي
كل عصره كلبي ينعصر*يا ريته خلصان العمر*كبل اخوتي وراح حيلي
ولا شوف كل اللي صار ** طبرة علي وحرك الدار
وبمحسن يفجعوني
وعاشرني من صغري النوح ** وساعة نزع مني الروح
تـمـنـيـتـهـم حضروني
*********
يوم المشيت لكربلـــــه*وضعني اخويه تكفلـــه*مأمنـــه ومصيون خدري
من وصلت الها دخلت*شفت الصفوف تعجبت*من عددها وضاك صدري
ليم الحسين توجهــت*ارد انشده يمـــه كعدت*رد عليــــــــــه جنه يدري
يختي يزينب هالجمـع*لا ذمه عدهم لا شـــرع*وهمـــــه ليكطعون نحري
ارد اخبرج عن عباس ** عالنهر يبقه بلا راس
وبذبحته يذبحوني
وضعنج سبي يختي يروح ** وساعة نزع مني الروح
تـمـنـيـتـهـم حضروني
*********
شحجالي لحسين نظرت*بطف كربلاء إتلوعت*ودمعي من دم يتجاره
الانصار واحدهم بدر*ضحو لبو اليمــــه العمر*وكل واحد يردد عباره
الاكبر بزغ مثل الشمس*وجسام محروم العرس*توذرو بارض المعاره
وعبد الله منهم مــا سلم*نبلة غدر بيها انفطــــــم*وحاله من حال الغياره
بكل الخيم شبت نار ** وايتام بالبر طشار
ويه الحرم اسروني
وكافل ضعوني مذبوح ** وساعة نزع مني الروح
تـمـنـيـتـهـم حضروني
*********
يوم الدنه مني الاجـــل*تمنيت مجموعه الاهل*يمــي تنظرهم عيوني
خواني يمي تنجمـــــع*والــــــروح لمن تنزع*عالقبله همه يمددوني
والحسن يجلبلي الكفن*وحسين يختملي السنن*بإشرافهم لو غسلوني
وعباس يحفرلي اللحد*باب الكبـــــر بيده يسد*ومـــن بعدها يلقنوني
وسفه تبدت الاحلام ** بجور الدهر والحكام
لثنين ما نصفوني
كلبي بقه يون مجروح ** وساعة نزع مني الروح
تـمـنـيـتـهـم حضروني
***********
يالمهدي هاذي عمتــــك*لليوم تنطــــر جيتك*تريد بيدك تجلي همها
والحضر مجلسها وسعه*للبــاري جفه رافعه*الليله يتوســـل بسمها
يطلب ظهور المنتظر*ويعلم بجيته لو ظهر*يحاسب الكلمن ظلمها
ويصفي ثارات الاهل*لبكربله خلصـو جتل*ويطلب بثــارات امها
الآمر وجه شب النار ** يصلبهم عله الاشجار
وينهي الذي عادوني
والشرك يهدمله صروح ** وساعة نزع مني الروح
تـمـنـيـتـهـم حضروني





الشاعر
خادم زينب (ع)
قاسم حتروش البلداوي