[الشاعر سعيد الفتلاوي]

قصيدة / يا حسين امعاهدينك
......................................
............................
.
.
.

وا اماماه وا حبيباه - يومك احنه ما نسيناه
جينه نهتف باربعينك – يا حسين امعاهدينك
وا اماماه وا حبيباه - يومك احنه ما نسيناه
.
.
.
................................
.
.
.
انت محيي الدين انته – والتريده الصار ردته
للظلم والجور زحته – بْدمّك الدين افتديته
الروح والدم مفتدينك – نْضحّي لاجلك يا غريباه
.
وا اماماه وا حبيباه - يومك احنه ما نسيناه
.
..............
.
كعبة الاحرار گبرك – يالشهيد وْ عالي قدرك
كل زمن يتجدد امرك – تبقه سر وْ من يفسرك
يالحبيب مْبايعينك – يا امامي وْ يا شهيداه
.
وا اماماه وا حبيباه - يومك احنه ما نسيناه
.
..............
.
نزحف الگبرك يغالي – نمشي ايام وْ ليالي
وْنهتف بْاسمك يوالي – لليعارض لا نبالي
وْنلعن اللي ذابحينك – يا حبيبي يا حسيناه
.
وا اماماه وا حبيباه - يومك احنه ما نسيناه
.
..............
.
فَجّرونه وْ ما يهمنه – وْيوصل الگبرك زَحِفنه
وينه ياهو اللي يردنه – وْيخسه كل باغي يصدنه
ودنه بالطف وْ نعينك – بْكربله مْصابك نعيناه
.
وا اماماه وا حبيباه - يومك احنه ما نسيناه
.
..............
.
هالنهج لا ما نغيره – واليعادينه نحذره
الناصبي الحاقد نِحيره – نفدي مذهبنه وْ ننصره
بْنهجك احنه تابعينك – اسمك الغالي فديناه
.
وا اماماه وا حبيباه - يومك احنه ما نسيناه
.
..............
.
بْهالمسيره الكل ينادي – ما تهمنه هالاعادي
من نسل ابن المرادي – واللي گطّع الايادي
واللي گص اصبع يمينك – للاله الحق شكيناه
.
.
وا اماماه وا حبيباه - يومك احنه ما نسيناه
.
.
.
..................................
..................................


خادم اهل البيت ( ع )
الشاعر الحسيني
سعيد الفتلاوي الطويرجاوي