[الشاعر سعيد الفتلاوي]

قصيدة / يا سيّد الاحرار
...............................
......................

.
.
.
اسمكِ بْگلبي انطبع يا سيّد الاحرار
نعمه من ربّ العرش حبّك يبو الثوّار
.
مْن الطفوله تْعوّدت انعه وْانوح عْليك
ياامامي وْيا شفيعي عمري روحي افديك
.
وْليدي باسمك من ينادي عينه تجري دْموع
مو غريبه مْن الطفل يبچي بْگلب مفجوع
.
المَلك والحور لجلك يا امام يْنوح
شْلون ماتبچي الطفوله وْعالرضيع تْنوح
.
دوم منصوبه المجالس ما تمل تنعاك
وْدومها انصارك تنادي يا ولينه فْداك
.
انت نبراس اليِثور اعله الظلم مولاي
ياللي نجمك شانه عالي مْضوّي كل دنياي
.
كعبة الاحرار گبرك باب للحاجات
يالكراماتك فلا تنعد يبو الطيبات
.
يا حسين اسرار شخصك يم اله الكون
واليعاديك نْحسب فاسق بغي وْ ملعون
.
شْگد طغاة العادتك نلعنهم بْكل يوم
يا شهيد الحق فلا مثلك ابد مظلوم
.
عاشر مُحرّم يظل شاهد عله الظلام
يوم اعظم فاجعه الفجعت نبي الاسلام
.
آدم وْ كلّ الرسل ناحت عليك دْموم
بيك كلّ حرّ نْفجع ناح بْگلب موروم
.
يالمصابك ناحت عليه الانس والجان
لا مثيل الهالظلم ما شافه كلّ انسان
.
باربعين مْصيبتك نگصد الك ماشين
افواج الك توصل زحف وبْحضرتك داعين
.
للابد يبن النبي مْصابك فلا ننساه
هالعهد لامّ الحسن يومك ازل ذكراه
.
ما يهمنه الناصبي لا جور لا ارهاب
يا ولينه مْصيبتك ناعيها بالاصلاب
.
خل يموت الداعشي بالغيظ والحسرات
نهتِفِ بْاِسم الحسين شْما جرت كلفات
.
.
.
...................................
...................................



خادم اهل البيت ( ع )
الشاعر الحسيني
سعيد الفتلاوي الطويرجاوي