شد حيازيمه علي فارس بدر = من طلع للمسجد يصلي الفجر
يدري هاي الليلة ميعاد الخلود = ويدري بيها مخضب بدمه يعود
وحيدر ويه الموت مايعرف حدود = والمسيرة التشهد وهذا العمر
ﮔبال عينه اتمثلت كل الفصول = مره يستعرض جهاده ويالرسول
ومره يرجع بالالم ضلع البتول = ويرجع الدلال بالهم يستعر
شال عينه وعاين انجوم السماء = ويمكن اتبسم لان حان اللقاء
ويه طه المصطفى وخير النساء = ويه حمزة وجعفر وذاك النفر
شد حيازيمه علي وﮔت الصلاة = لن سمع اصوات ذيـﭷ الصايحات
ﮔلها صيحن من بعدكم نايحات= وهذي اخر خطوة امشي ويالقدر
الكون والافلاك وﮔفت بانتظار = فازعة ومرعوبة من اخطر قرار
بعد ساعة وينفتح باب الدمار = وعاصف الاسود يهب بكل كتر
بعد ساعة يزلزل الكون المصاب = وبعد ساعة وتبتدي رحلة عذاب
وهامة الاسلام وآيات الكتاب = بسيف ابن ملجم تُصاب وتنطبر
فتح بابه وﭼــنه ناوي عله الرحيل = وﭼـــنه هذا الكون يصرخ بالعويل
وين رايح يا علي حامي الدخيل =عــﮕبك الاسلام يوليه الخطر
وين رايح يا علي يابو الحسن = وياهو للأيتام يا محيي السنن
والله بعدك ترجع اتباع الوثن = تلبس الاسلام بثياب الكفر
صدﮓ يا بو حسين تتركنه وتروح = وصدﮓ بيدك تفتح ابواب الجروح
تدري يا مهجة تخليها تنوح = هاي زينب يا علي ام الخدر
يا علي دين النبي وضعه خطير = واحنه يا بو حسين من دونك نحير
يا علي ايتام من بعدك نصير = واحنه محتاجينك احنه بكل عصر
يا علي لليوم جبريل الامين = بكل شهر رمضان ينعاك وحزين
بصوته يصرخ يا امير المؤمنين = زينبك بالشام جيتك تنتظر
ونسألكم الدعاء
بقلم عمار جبار خضير
2013
شد حيازيمه علي
العرض الشجري