بهيده يالسجاد نزلني إبكبري ... ورش عليه الماي بدموعك التجري

ابوتكتم الخير · بتاريخ : 28-11-2012 الساعة : 07:28 PM

بهيده يالسجاد نزلني إبكبري ... ورش عليه الماي بدموعك التجري

***********

بهيـده شـيل الجسـم يبني مـن تلمه

جسمي يوليدي أمـوذر نشـف دمـه

بـخ عليـه الماي مـن عينـك وشـمه

وتلكه يبني خنصري المكطوع يمه

ويبني عبد اللـه أدفنه على صـدري

ورش عليه الماي بدموعك التجري

**********

يبني المثلث ضهدني ومرد جبدي

وعلى كيـفك مـن تنزلني أبلحدي

ومــن توسـدني أبأيدك على خدي

أقسـم آنـه عليك يبني بأســم جدي

يمي الأكبر يبني أدفنه هـا يعمري

ورش عليه الماي بدموعك التجري

**********

بكه أخيك يبني الأكبر لسه بالحر

وجسمه يوليدي مثل جسمي توذر

ومثل جبدي يبني جبـده هـم تفطر

يبنـي مثلـي ظـل ثلـث تيـام بالبـر

خلني أحظنه يبني والله نفذ صبري

ورش عليه الماي بدموعك التجري

************

وجاسـم العريس يبني مــن تدفنه

بهيده يبني ويه جسمه من تحظنه

نبــل ورمــاح وسـيوف اليـزفنـه

ومن دمه راسه ونحره يبني حنه

والضمه نيرانه والله بجبده تسري

ورش عليه الماي بدموعك التجري

**********

وبعد يبني ظل جسـم فوك الشريعه

عينــه مطفيـه بسهم واللـه فجـيعـه

ومنه أيـده اليمنـه واليسـره كطيعـه

شــيلهن يوليـدي وإ نــده يالوديعـه

شيلي أجفوفه ييمه أنكـسـر ظهري

ورش عليه الماي بدموعك التجري

***********

يبني عمـك عل النهر بمجانه وسـده

ولــم جفـوفـه وردها يوليـدي الزنـده

وشيل يبني رايته وحطها أعله لحده

وصـيحي ياربـي منـو يرفعـها بعــده

أدري يـرفعـها المهـدي واللـه أدري

ورش عليه الماي بدموعك التجري

ـــــــــــــــــــــــــــ

قاسم طاهر القاسمي

اليوم / 13 / محرم /1434