[الشاعرخالدالسعد]

صلاة الليل عشكت حيدر الكرار

گد ما للفجر حيدر يأديهة

ومن فگدتة غايب ليلة العشرين

صعدت لسّمة خاطر يصليهة

ومثل كسر الضلع محرابة ضل مكسور

ونزلت فاطمة وصلى الضلع بيهة

وذو الفقار هد بس هد بلايا جفوف

سيف ابلا علي ...شيكضة ؟ يفنيهة

ولولا حكمة الباري بهذاك اليوم

عن بكرة ابيها الدنيا يفنيهة

خلف السيف صوت اينادي ملجم وين

ثاري الحمزة نزلت روحة هد بيهة

واجت عصاة موسى تعزي ذو الفقار

عن السيف فرسخ شبت ايديهة

نار السيف صار ولو طلع مليون

راس لابن ملجم مايطفيهة

آخر روح تؤخذ روح عزرايين

وماضن غير حيدر ينزل اعليهة

لحيدر بحر الاسود لبس سود ثياب

مو حكها الارض تلبس لياليهة؟

مساكين الارض يندلهة لاخر بيت

ولو فوك القمر فقرة ايتعنيهة

ومثل غيمة مطر تندل زرع عطشان

يفتر عاليتامة وجفة يمطرها

(لتعلم اليتيم اعل الفرح ) مكيول

هيج المثل جان بوكت حيدرها

علي القائد العام بوحدة المختار

من نصر لنصر والوحدة بامرها

وذا طب للحرب يحتار ملك الموت

خيل اعل الفوارس يكلب اظهرها

جيش المسلمين بأحد شال ايديه

(يارب هالجيوش بعيني صغّرها)

وذو الفقار جاع ويدعي رب الكون

(يارب الجيوش اكبالي كثرها)

ومثل سلسلة مالك والرگاب اوتاد

يربط مقدمهة بطرف آخرها

بحيث الرووس عدهن صطفاف ايصير

اذا مو بالعرض بالطول يشطرها

علي اول قصيدة ابقلم رب الكون

علي اول قصيدة اعبدت شاعرها

ومن تصعد المنبر انبياء الله

تتوضة لصعود المنبر اطهرها

وعلي لمسجد الكوفة الجمعة من ايروح

جان لخطبتة يتوضة منبرها

على جتاف النبي بالكعبة شاله وكام

هبل واللات حيدر بيدة طشرها

ومن شاله النبي شال ايدة حيدر فوك

ولو راد النجوم بحضنة يشمرها

حيدر والنبي المفروض جانو توم

بس ماكو مرة بهالحالة تكدرها

لان ماكو رحم يحمل اشموس اثنين

كل شمس برحم بالقدرة صورها

بس ام حيدرا ما كدرت الكرار
لوما بوالحسن بالكعبة حاضرها