[ابوسيف الكيتاوي]

بسم الله الرحمن الرحيم

قصيدة لطميه لخادم الحسين الشاعر صباح نوري الكناني


ينوح الماي عله ابن امي انذبح عطشان وكثر همي
ذبيح حسين بخضابه ينوح الماي لمصابه
------------------------------------------------------
تكول اهل العقول النعمه بالنسيان
تهون الفاجعات وتبرد الاحزان
بس ما ينسي حسين انذبح عطشان
فجع كل الحياة وزادت الاشجان

مصاب حسين نسه النسيان فجيع الكون على الظمآن
حزن ما ينغلك بابه ينوح الماي لمصابه
---------------------------------------------------
بمصاب ابن امي كل الدنيه مفجوعه
الخلائق كلهه تبجي بحسره وبلوعه
الحجر مابيه عجب من تنزل دموعه
العجب نسمع حوافر طحنت ضلوعه

العجب ينكال على آلامه تدوس الخيل على إعظامه
دموع العين سجابه ينوح الماي لمصابه
---------------------------------------------------
مثل مأساته ما مرت ابد مأساة
على طول الزمان امصابه بالحسرات
من ماي الشرب محروم اخوي ومات
ضاكت روحه من حر العطش آهات

ينوح الماي على جروحه كضت نار العطش روحه
بقت نيرانه لهابه ينوح الماي لمصابه
--------------------------------------------------
عسن لاطال عمري ولا شربت الماي
وروحي من المصايب فاركت دنياي
انوح حسين ضامي ودمعتي بعيناي
احاجي الماي بعتابي وينوح وياي

احاجي الماي وكله تهون انذبح عطشان اخوي شلون
تسيل دموعي بعتابه ينوح الماي لمصابه
------------------------------------------------
احس بالماي يبجي ابطن اليشربه
حزن عاليبسوا جبده وذبل كلبه
انذبح عطشان اخوي ابديرة الغربه
واليفزعله منهم يفزع ايسلبه

اسمعه الماي يون صوته على المظلوم بعد موته
طريح مسلبه ثيابه ينوح الماي لمصابه
--------------------------------------------
كثر همي وعويلي وما رحمني البين
عله ابن امي الكلب شاجر وادير العين
شفت منحر كطيع وراسه رايح وين
لكيته اعله الرمح متعلي راس حسين

بنزف دمه شكثر قاسه وصعد فوك الرمح راسه
بنحر متوسد اترابه ينوح الماي لمصابه
--------------------------------------------

لخادم الحسين الشاعر صباح نوري الكناني