[مرتضى شكر]

لتصدك إنسينه

قصيدة ولائية شعر: مرتضى شكر

بالكلب خطينه --- لتصدك انسينه

لافتى إلا علي --- لافتى إلا علي

--------------------

أيه أوعلى الناس --- ربك فرضها

أبمحراب الكلوب --- أدت فرضها

أنشودة إيمان --- والحك نبضها
حب حيدر إبزود --- أصبح ومضها
تنزف وفه أو غيره --- مالاكت لغيره
لافتى إلا علي --- لافتى إلا علي

--------------------

راية التوحيد --- خفكت إبيمناه

حيدر الإصلاح --- والعدل معناه

والمصطفى إبخم --- إبنص قدسي ولاه

بي تمم الدين --- وأكتمل بهواه

صلت ليالينه --- أذن هوا بينه

لافتى إلا علي --- لافتى إلا علي

-----------------------

حيد إبكل دور --- للنصر رايه

بالحرب كرار --- ينزف منايه

بدر إله أو بحنين --- جم أيه وأيه
سر نقطة الباء --- إقره الروايه

مثل النده الصافي --- أنشودة إشفافي

لافتى إلا علي --- لافتى إلا علي

-------------------------

إتصفح التاريخ --- بسطوره شتكول

صنو النبي جان --- ساعد المرسول
عا لكفر صب موت --- صارمه المسلول
والنصر بلواه --- كل وكته مشتول
والمجد بجفوفه --- ماجزر معروفه
لافتى إلا علي --- لافتى إلا علي

----------------------

موطمع بجنان --- لاخوف من نار

طاعته للباري --- عن وعي أو إصرار

كوثر المحشر --- بجفوفه يندار
عهد إلنه وياه --- كعبة الأسرار

كل عاشك إبحبه --- طاف أو سعه أو لبه

لافتى إلا علي --- لافتى إلا علي

----------------------

الجمعة 22/ذو القعدة/1432هـ المصادف 21/10/2011م

النجــــــــــــــــف الأشـــــــــــــــرف