[جابر النجفي]

بسم الله الرحمن الرحيم
اللهم صل على محمد وآل محمد وعجل فرجهم

إبوذيات في مولد المجتبى عليه السلام
ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــ
إذا رايد شِفَه منّه وطيبه == زور المجتبى إو جدّه وطيبه
تشتم من بُعد عطره وطيبه == ترد مسرور وأيّامك زهيّه
ـــــــ
هنّوا المصطفه إو حيدر وزهره == نِبَع نور الحسن غصنه وزهره
نجوم البلسمه فرحتْ وزُهره == بميلاد السبط صارت ضويّه
ــــــ
دنيانه الحسن نوره وطاها == هنّوا فاطمه إو حيدر وطه
أبو إمحمد ملَه الدنيه وطاها == كرم موروث من حامي الحميّه
ــــــ
ثبت قلبي على حبّه ولامال == أبد ماريد أي أجره ولامال
عسل حب الحسن يروي ولامال == أفوز إبشوفته يوم الجزيّه
ـــــــ
جبريل الملك مرسول بِسماك == فرح من شاف نور إو فاض بَسماك
يمولانا الحسن ويّاك بسماك == يريت إنصير وإنهنّي الزجيه
ـــــــ
سمع بيك إو مشه الدنيه بدرها == يبن حيدر علي فارس بدرها
أمّك رضعتك طيبة بدرها == غطّاك الحِسِن وأصبح هويّه
ـــــــــ
كريم المجتبى فيّاض كفّه == عن وجه الفقير الضيم كفّه
إنطاه اليريده إبزود كفّه == تسلم إيد أبو النفس الأبيّه
ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ ـــــ
مع تحيات شاعر اهل البيت / جابر النجفي
إسمعوا الأبوذيات على هذا الرابط
http://www.wlidk.net/dldje755198.mp3.html