وين خيرك ياعراق بقلم الشاعر ابو صلاح الساعدي

اسامه الساعدي · بتاريخ : 28-07-2011 الساعة : 12:53 AM

وين خيرك ياعراق

بقلم الشاعر المبدع ابو صلاح الساعدي

انه ارفض رفض قاطع ... وأنتظر كلمه جهاد من المراجع

الأحتلال انه بانواعه ارفضه....وأنته تسمع ياعراق شلون قانع
وأنه ارفض كل جداول الانسحاب ...والأحتلال بأنسحابه خل يسارع

المدافع تربك اوضاع الأطفال ...مااريد اسمع بعد صوت المدافع

انه ماريد العراق سجن للناس التحبه ...وانه اطالب برفع جدران الموانع

وانه اريد الله أكبر بالصلاة ...ويصلي وياي العراق بكل ضريح وبالجوامع

شيعي مااريد ويه سني بأي خلاف ... وكلنه خل نحفر مواضع
حتى نطرد الأحتلال حتى انشيل العراق... وما اريد الموت شاري وانته بايع
وما اريدن جوع بشفاف اليتيم ... يبجي يم امه ويكلها انه جايع
اتحيرت بالحصه ماجاي الطحين... حيل صرخت من فكرهه وخلصن كل الذرايع
ما اريدن كبل لاتطلع شمس اتفز اليتامه... تفتر اتدور تنك ابزبل الشوارع
وعالرصيف ام العراق ماده جفهه وتجدي ... بقفل عندك ادري مسدوده المسامع
انه اريدن شيله امي علم ويرف عالعراق... ويمــسح انهـار المدامع
انه اريدن شيله امي ستر لعيون الحديثه ... حتى عيون الذيابه ما تباوع
انه اريدن شيله امي غطه اتدفي كل يتيم ...ماتوا اهله بليل طالع
طالع يعاين عله اعيون الرصيف ...يمشي ومتيه طريقه بليل ضايع

اهناك ينتظره الأرهاب لبسوه احزام ناسف ... وجف غدرهم عالرصيف الغام زارع
بعد وين الخيركلي ياعراق ...الموت شاخص بعده بالفقره يصارع
بعد وين الخير كلي ياعراق... جردو ستر النساء وشككوا حتى البراكع
بعد وين الخير كلي ياعراق ... نشفوا دجله وفرات من المصب حد المنابع
بعد وين الخير كلي ياعراق ... شعبك المجروح ينـزف وصرخ حيل من المواجع
كافي مو راح انفجر بس ياعراق ... شوكت راح اسمع بعد كلمه جهاد
انه مسجون بسجن كلش زغير ... اشلع الشباك واعلنها حداد
وارفع جنازة عراقي ...والبس هدوم السواد
انه شمتاني اذا مات العراق ... وتذري اتراب دجله وتنعي ابغداد
انه ابن العراق ابن المعاناة ... يحكمني يهودي امسلط وجلاد
انه ابن الكرامه الهابته الناس ... اطخ راسي ذليل أبحضرت اوغاد !!
انه غيره وبيه مرسومه الشجاعه ... انكلب رشاش وسنوني عتاد
انه ابن الشجاعه وكلها مني اتخاف... لو صعدت الغيره وردت ادك اعناد
اشيل الكاع كلها وحيل اكلبها ... السلم مجروح منهم مايصحله اضماد
بعد ما اساوم لان ضاع الصحيح ... وضعك ياعراق اعذرني مايراد
منك ايست ماشفت منك خير ... اشعل نار بيهه وخلهه تصفى ارماد
انه المفتاح عندي واندل الأرقام ... احسبها صحيح ابراسي العداد

القصيده بقلم الشاعر المبدع

أبو صلاح الساعدي

حزيران ــ 2011