[Nakheel_Aliraq]

قصيده للشاعر حسن السيد عاجل
من زغري عليه مرادف النكبات وطكات الزمان ايضيع بيهه العد
متعود عليهن والتفوت اتهون لان ادري الوراهه اتصير منها ازيد
فصلت الحزن ثوب ولبسته اسنين لايقبل اذبه ولا قبل يركد
وحملني الزمان اجروح فوك اجروح واجروح الزمان اشلون تتضمد
متحملهه وثجيله وبعد عنها الراك اوجفتهه اصبحت للماي حد وحد
وملكاها اوي جاري وتمر عالشمات ويانار الشماته الدوم ماتخمد
واضحك والسوالف موش جنهه اوياي مابين خلل للناس متعمد
اومن ادري ابرفيجي يريد بيه ايعيل بعتابه الخجل ياخذني واتردد
ولا فطره وسذاجه وموش تايه راي لجن طبع التسامح وي كل احد
ولا عمري بنيته ابدغش وي الناس ومن ابني العلاقه ابنيها حل وشد
ولا عمري جفيت ابعشرة الطيبين ولا عمري بديت ابكطع حبل الود
انسف بالربع واوزنهم ابميزان و موكل الضحك وياي بيه اضمد
اسايرهم حياء وادري مايوفون لمس بيدي لمست ومنهه متاكد
جثيرات السوالف والمجال ايضيج و موضوع الافتحه ادريبه ماينسد
اكره كل منافق يحجي بالوجهين يضحك للجبيل وهوه كلبه اسود
واحبن هالوطن وترابه والطيبين و ادعيله ابصلاتي من اركع واسجد