[rafedy]

ايكول (عبيد ال مبارك) البارحة كعدت وانتقدت نفسي انتقاد فلاحي وكلت اوهومداي اوهومداي ولو تسالني ليش انتقدت نفسي جنت احجيلك السبب.
كتله يا ابو مالك شي جيد ان الانسان يراجع نفسه وينتقدها اذا كان عنده اخطاء او تصرفات غير لائقة على ان لا يعيدها والا ما سوينا شي..
كال لا يخوي مولهحد وانما انه متبلي العالم احجي على هذا واحجي على ذاك ولو بالحق وعالظواهر السلبية لكن اكو ظواهر ايجابية ما انتبه الهه قابل كام عندي الروط وكمت ما امشي الا على صفحة.. كتله النتيجة من هذا حجيك ما امشي الا على صفحة كتله النتيجة من هذا حجيك شنو كال مو اتحس هاي الايام اكو تحسن واضح بالكهرباء وقلت ساعات القطع وتحسن عمل التيار كتله ها هم جبتنه للسياسة كال لا اقصد التيار الكهربائي بحيث خلاني نحسن الكهرباء احجي ويه الاجهزة الكهربائية الموجودة ابيتي مثل المخبل واحاجي البنكات والمبردة والاركندشن وكلهن ولله لو ما الدنيا باردة جان اطلع حيفي منجن واخليجن ادكن ليل ونهار لكن بيجن بخت ومطرت الدنيا وبرد الجو...
كتله هذا السبب يا عبيد بتحسن الكهرباء هو الترشيد وقلة استعمال الاجهزة الكهربائية المنزلية لان انتفت الحاجة الها..
كال ساهي ابو الثلج جان يحلم يشتري اركنديشن ولمهن فلس فلس وكبل شهر يله اشتراله واحد ونصبه بالغرفة وشغله ولن راسه ونام جواه جهاله ومرته انهزموا من البرد وهوه ايطك منخر ايكولوله يابه طفيه ايكللهم بعدني ما شبعان منه لما لمله وجعه وكام يرجف ويكح وصخونه تاخذه وصخونه اتجيبه ولمن سئلوه اشلون تمرضت كال:
عود انه مثل الناس هم عندي تبريد
ما شغليته الصيف ضميته للعيـــد