[عاشقة_السيد_القبانجي]

كربلاء
للشاعر : مقداد الهمداني

كربله اسمج بقلبي مسجله
كربله يا كربله
غير اسمج هالقلب ما يقبله
كربله يا كربله

كربله قبلة مجد و أشرف مكان
صلت إلها قلوبنا وي كل أذان
كربله الأم اللي رضعتنا الحنان
يعني هيه التحت جدمها الجنان
و اللي ما يزور أمه ما ينول الثواب
و الله فرقتها عذاب
و الـ يفارق أمه يا قلب إلَه
كربله يا كربله

كربله اسمج بقلبي مسجله
كربله يا كربله
غير اسمج هالقلب ما يقبله
كربله يا كربله

كربله شرد أحجي عنج شرد أقول
يلي بيج اندفن ضي عين الرسول
حارت الأفكار بأمرج و العقول
اتزول كل الدنيا حبج ما يزول
شوفي انتي اشقد إلج عزة و مقام
يالتحضنين الإمام
خصج الله بشرف محد يوصله
كربله يا كربله

كربله اسمج بقلبي مسجله
كربله يا كربله
غير اسمج هالقلب ما يقبله
كربله يا كربله

كربله و أفكاري لو بأرضج تطوف
تقطع بروحي العوالي و السيوف
و الحجي يتقطع و يصبح حروف
و يجتمع عد قبر مقطوع الجفوف
عد قبر عباس يتعالى الونين
من وسط قلبي الحزين
و ألقى دمعات على خدي نازلة
كربله يا كربله

كربله اسمج بقلبي مسجله
كربله يا كربله
غير اسمج هالقلب ما يقبله
كربله يا كربله

كربله و قلبي إذا بقاعج يسير
تهمل دموعي بشكل ماله نظير
و أعثر بدمعة جفن بنت الأمير
زينب الـ بيها الصبر ظل يستجير
و على تل الزينبي دمعي يسيل
و أندب قليبي القتيل
قلبي فوق رماح دمعاتي اعتلى
كربله يا كربله

كربله اسمج بقلبي مسجله
كربله يا كربله
غير اسمج هالقلب ما يقبله
كربله يا كربله

كربله و لو أذكرج وقت الربيع
أذكر الوردة التروت بالنجيع
و يقطع بنحري سهم طفل الرضيع
عالصبر و اشما يدلوني أضيع
و ألقى من عيني جرى ذاك النزيف
و الربيع أصبح خريف
و تبقى وجناتي بدمى متغسلة
كربله يا كربله

كربله اسمج بقلبي مسجله
كربله يا كربله
غير اسمج هالقلب ما يقبله
كربله يا كربله