[نووورا انا]

اللهم صل على محمد وآل محمد



غايب ما نلومك
أنصارك خصومك

عندك عدو عندك محب إلمن تحاسب

* * * * * * * * *

يا المهدي ربك أيدك


النشر الشرايع مهدك

واعدك ربك بالنصر ترعاك عين الواعدك

اثلثميه و اثلاثه و عشر بارينه بيهم جندك

يا نايبه اللي ما تهل صبر الصبرته و تضهدك

طبرة علي و كسر الضلع سم الحسن يترصدك

نحر الذبيح ابكربله عن ثار دمه ايناشدك

ثارك لا تعوفه


سوي اللي تشوفه

ما غيرك ابهذا الأمر يمضي و يطالب

عندك عدو عندك محب إلمن تحاسب

* * * * * * * * *

ابوجهك ملامح للقهر


حرفتهن أسياف الدهر

تبدي ابرحيل المصطفه الحد غيبتك يالمنتظر

واحد بعد واحد مضوا أسلافك الصفوه الغرر

ثارات عندك أربعه تيم و عدي و حرب و صخر

الأول غصب منكم فدك الثاني الضلع أمك كسر

الثالث طبر هامت علي الرابع سفك دم النحر

و انت ابهذا حالك


إعمل ما بدالك

محد يلومك سيدي ومحد يعاتب

عندك عدو عندك محب إلمن تحاسب

* * * * * * * * *

انهدت قواعد أسرتك


و بيها الدهر أزره و فتك

و انت أعرف ابمنهو الهدر دمكم و للحرمه هتك

اتشخص عدوك سيدي و لو ما ستاير غيبتك

جان ابشبه اسيوف الغدر طل و هدر دم رقبتك

هذا العدو اتبين الك فجر منابع دمعتك

و عندك عدو ثاني بعد اتقمص ابثوب امحبتك

بثياب الفضيله


ايمارس كل رذيله

اشما يختفي اتوضح الك يبن الأطايب

عندك عدو عندك محب إلمن تحاسب

* * * * * * * * *

ظلم الأوائل ما جمع


غير المجازر و الهلع

ظلم الأواخر يختلف لابس جلابيب الورع

مؤمن تشوفه ابظاهره و بالباطن اتوج الخدع

مالك الأشتر حسبت لنه ابن ملجم طلع

ابدينك يبيع و يشتري بالدجل و الغش و الطمع

أفعاله مثل اللي اجه و صله الصبح بثمن ركع

عاشوا عالخيانه


ما حفظوا أمانه

كل ساعه يلفون ابشكل مثل الثعالب

عندك عدو عندك محب إلمن تحاسب

* * * * * * * * *

أنشد يطوفان الإبه


وأترجه منك أجوبه

ساعة ظهورك سيدي من ترتفع بيض الضبه

يالمهدي بيمن تبتدي ابسوء العقاب اتعاقبه

واحد سلب واحد كذب اليا باغي تبدي اتحاسبه

تبدي ابنواصب حللوا دم الحموله الطيبه

لو بالمحب اليدعي ابهاي المحبه الكاذبه

واليكذب يخالف


واتكشفه المواقف

و المخلص الحر ينكشف عند التجارب

عندك عدو عندك محب إلمن تحاسب

* * * * * * * * *

عاصرنه فتره مظلمه


لا من سنن لا أنظمه

يالمهدي إرهاب و ذبح زمرة لعينه و مجرمه

بالشيعه فتوه صدروا متوقعه ابسفك الدمه

آخر جريمه اللي بدت منها العصابه الظالمه

مرقد علي الهادي انهدم بيد الأيادي الآثمه

و مرقد ابوك العسكري جور النواصب هدمه

ابتهديم المعابد


تفجير المراقد

بين حقدهم و انفضح كل باغي كاذب

عندك عدو عندك محب إلمن تحاسب

* * * * * * * * *

إرهابي هذا ابفتوته


ايعادي الرسول و عترته

لو حاضر اويانه علي هم جان طبروا هامته

لو عايش اويانه الحسن ايوذرون بالسم جبدته

و لو جدك احسين انبعث هم جان قطعوا رقبته

ميت علي الهادي و إجو بالحقد هدموا قبته

ميت أبوك العسكري و عادوا عليه امصيبته

واتفجر ضريحه


بالفتوه الصريحه

يا وسفه جدك يندفن بين النواصب

عندك عدو عندك محب إلمن تحاسب

* * * * * * * * *




جابر الكاظمي