[خالد محمد مهدي]

يهل الضمائر طفله لحسين وسبيَّه

اليوم بحبال اليسر أخذوا رقيَّـــــه

*********

طفله الهظم ألهه كّصد من زغر سنهه

يوم الطفوف أنفكّد من عهدهه حضنهه

ظلت يسيره أتعايــــــــــن أدِّور أمنهه

ماعرفته مذبوح فوك الوطيَّه

*********

لوعة كّلب والنوح مايسكت بجيهه

أتصبرهه بدموع الحزن هسَّه يجيهه

ضاكّت عليهه الدنيه منتظره وليهه

تدرين ياعمه الابو خيمه عليَّه

********

بالكّوه نامت وبحلمهه شافت حسين

كّعدت بحضنه وشبكته والدمعه بالعين

مرعوبه فزَّت من حلمهه أتصيحه لاوين

هذا أوداعك ألي لو هم ألك جيَّه

*************

صرخة يتيمه من الزغر تكسر الخاطر

وزينب بكّت محتاره ما تدري شتجابر

وشلون تتحمل بعد هاي المخاطــــــــر

وشولن يحمل هل العمر هاي الاذَّه

***********

ألتمت الاطفال كلهه أتصيح وينه

ياعمَّه مو كّلتيلنه الرايح يجينـــــه

طوَّل الغيبه أنريد هل الساعه ولينه

يحضر أيعاين حالنه بهاي المسيَّه

ماسكتت من البجي لابطلت رجاهه

الظالم سمع اصوات زاعجته أبجاهه

أبطشت راس حسين أمغطَّه أجاهه

أبن الدعي وأفعاله صورة آل أميَّه

***************

شبكَت الراس وحاجته من لليتيمه

والله يبويه أتروح من عندي جريمه

أكعد وعاين حالتي بويه بهظيمه

وياك بويه ريت تاخذنه المنيَّه

***************

شهكت نفسهه أودعت دنيه المصايب

اقسه كّلب من الجــره بدموعه ذايب

واقع الدنيــه هذا مو دنيــــه العجايب

بخرابه صار أله كّبر يبن الزجيَّه