هل هلال المحرم ... بثياب الحزن والهم
********
يهلال الكدر هليت ... شمالك منكس ومحمر
يهلال الحزن يهلال ... ودم من الجفن يكطر
يهلال البله والشـوم ... كدرت البحـر والبـر
يهلال وبعـد هـم بيك ... مـن هـذا الكدر أكثر
******************
أكثر حزن ابـو الزهـراء ... يهلال وبعـد ينـغـم
ياجسم التدوسه الخيل ... بيك وياصدر يهشـم
ويا جبهه التخضب بيك ... ياشهر وتسيل الدم
ويـا نحر انكطـع يهلال ... بيك مـن الكفه أتكلم
*************
إتكلم يشهر الشـوم ... لا تســكت وحـاجـينـي
جلجلت بهموم الكون ... وما أدري شتراوينـي
وألبست الثياب السود ... وفاضت بالدمع عيني
يهـلال الألــم والهـم ... بنارك أنتــه تجـوينـي
***************
تجويني بألم وهموم ... من يوم أطلعت يهلال
ذابت والله بيك الروح ... وطاريك يشل الحال
يهلال شكثر مشؤوم ... لاجن ما غبت عالبال
يهلال يتجدد بيك ... كل يوم الحزن عل الآل
**************
عل الآل يتجدد بيك ... دمع وحزن يالميشوم
بيك أنثكلت الزهره ... من ذبحوا أبنها الكوم
وزينب بيك مسبيه ... وعليل مجتف ومالوم
هاي مصايبك يهلال .. وصوت الفاجعه لليوم
************
صـوت الفـاجعه يهلال ... نـار وبالكلـب لاهـب
مثل نار الخيم تسعر ... بوجهي وللعقل سالب
لا مـا تنطـفي يهـلال ... نـار بكلب المطـالـب
أوعدك يظهر الموعـود ... وياخذ ثاره الغايـب
ــــــــــــــــــــــــــــــــــــــــــــــــــ ـــ
قاسم طاهر القاسمي 29 / ذي الحجه /1433
صباحا
هل هلال المحرم
العرض الشجري