[دمعةرقية]

چبير الطف واحس زغار الابيات
اشكد حاولت بس بالناتج اخسر
من ايگدر خيالي الصوره عالبيت
فرق شاسع يگلي بيتك ازغر
واشك بي والگه صورة زينب الله
بس ما كفه بيتي زينب اكبر!!!
كلت اخذ خيالي هناك واختار
وانه اسئل ابروحي ياترى اگدر ؟؟
وبديت اسمع صدى صوت العصف ريح
وبدت تحترگ روحي واشعر ابحر
وبديت اسمع صياح عيال الحسين
وعلي السجاد اشوفه ابسنسله انجر
وواحد صاحلي غض عينك ارجوك
لا تفتح عيونك الضعن مر !!!
وصلت ابوكت مابي للضوه خيوط
بس انه ودمعتي فارغ البر
ولان بس بالي جبته بلايه رجلين
كل ثانيه ابجثه بالي يعثر
واسمع بالخيم صوت المشي جدام
وتجدد امالي وگلبي ينسر
واركض للخيم بلكت عدل ضال
والگه البالخيم دخان يفتر
ردت ادخل وطب دخان بالحيل
واتراجعت خطوه وانه مضطر!!!
واتنفست دمعي وانه مخنوگ
وانجمدت اطرافي وانه محتر !!!
واتبعثرت كلي وانه مجموع
واصفرت اوراقي وانه مخضر
واطاير صوابي من هوه الخوف
واتضحت الرؤيه وانه مغبر
وافترن ابروحي نوگ الهموم
واستوطنن بيه وانه مقفر
وانفك باب راسي والشِعر طاح !!!
مابين الزمته والتكسر
واصطكن عيوني گوه فكيت
جفني ردت اشوفه والله منظر ؟؟
بخيمت زينب الگه تاكل النار ؟؟؟؟؟
زينب وابحرمهه جمره تسعر
زينب هيج هينه ما مش احباب ...
تبني للعقيله خيمه مرمر ؟؟
ما مش وادم ايطفون الخيام
اذا جود ابو فاضل ايتأخر ؟؟
عله هالحاله بالطف استمريت
اشما تكثر ادموعي اسئل اكثر ؟؟؟
امشي ابگاع موت مگذله سهام !!
اصفه لون بيها لون الاحمر ...
وعله خدودي دمعتي هدت الخيل
مثل هدت الكافل عالمعسكر
احچي ايرد صداي امچلبه بي نار !!!!
حتى الحچي بالطف ما امعشر
اسكت..؟؟عيب!! احس خيالي بي روح
خاف ايگول ضلي عني قصر !!
من هاي عرفته اشسوه عباس؟؟
وعرفته ليش دوم ابعيني يكبر
ابو فاضل گطع چفينه عن لا
وكت البي الفزعه چفه يگصر
وزينب عله التل ما حشمت بي ..
لا لو صايحتله ما تعذر
ابو فاضل ذخر مضموم لحسين
ومسرفن اردانه ابعالم الذر
الموته البلگبور ابوكت الحساب ..
ايحطون اخو زينب عله منكر
واتلافتت عيني وينه عباس ؟؟؟
بس انه وكتهه جلدي كزبر !!!
همس واحد بذاني گله عباس
اله اتصيحه زينب يله يحضر .