[جابر النجفي]

بسم الله الرحمن الرحيم
اللهم صل على محمد وآل محمد وعجل فرجهم

نبــــــــــــراس للأحـــــــــــــــرار
ــــــــــــــــــــــــــــــــــــــــــــــــــ ـــــــــــــــــــــ
نورك بزغ بالكون يحمل رساله == وإبمكه حل هالنور يزهي إبجماله
من البشر مُختار == نبراس للأحرار
ـــــــــــــــــــــــــــــ
وإبمكه صار اليوم مولد نبينه == نوره وصل كل صوب حتّى المدينه
وإنْهَنّي بالمختار حيدر ولينه == وإنطش ورد للجاي نرفع إدينه
وإنّادي كُلنا إبصوت == نهواك حد الموت
ياسيد الأبرار == نبراس للأحرار
ــــــــ
أرض إو سمه إو أملاك فرحتْ تنادي == حل نورك الموسوم يملي البوادي
كل الشجر والطير يهتف يهادي == أهلاً وسهلاً بيك كِيد الأعادي
أهلاً وسهلاً بيك == هالكون إمْتانيك
تمحي إله الشرار == نبراس للأحرار
ـــــــ
حيّوا الوليد اليوم فرحوا يشيعه == خير البشر مولود قلعه منيعه
هذا الثرى فرحان أعلن ربيعه == أحمد إجَه للناس نعمه وسيعه
أحمد إجَه المأمول == حيّوه هالمرسول
بيه الهدايه إو صار == نبراس للأحرار
ــــــ
ياأمة الطغيان هذا محمد == نوره ظهر برهان يمليها أمجد
خلقه عظيم إو صار للأمه فرقد == يضوي دروب الناس للعالي يصعد
يهدي البشر للخير == وإينادي بالتطهير
بيه العدو محتار == نبراس للأحرار
ــــــــــ
محظوظه أرض الخير بيها إنولد لاح == نور النبي المختار منها العطر فاح
عم الأرض كل خير والشر مضه إنزاح == نور الرساله صار بلسم لِلَرْواح
عم الفرح عالناس == وإتهاوت الأرجاس
يحوي النبي الأسرار == نبراس للأحرار
ــــــــ
ما عندي غيرك سور يوم القيامه == تشفع إلي مولاي وأحظه إبسلامه
تحضر يبو الزهراء قبري إو ظلامه == ويّاك أبو الحسنيين راعي الشهامه
لِحْدي يشع أنوار == ما شوف أبد أي نار
من طلعة الكرار == نبراس للأحرار
ــــــــــــــــــــــــــــــــــــــــــــــــــ ـــــــــــــــــ
مع تحيات شاعر اهل البيت / جابر النجفي
يمكنكم سماع طور القصيده بصوت خادم اهل البيت عليهم السلام
على الرابط التالي
http://www.wlidk.net/dldivs76932.mp3.html