[احمد العراقي]

الانصار

هزهم غيضهم واركبو موج النار
همّوا زودهم بمخاطف الاخطار

شدّوا حيلهم وابتضحيتهم صال
مضماره البطولة وياهي من مضمار

سمعوا صوت يدعي لنصرة المعبود
صوت حسين هذا البيه عزمهم ثار

صاحو من حرم عاشور يبن الدين
يا وهج النبوة وكعبة الثوار

احنه انصار

صاحو والمنايه اتلوچ بيهم لوچ
وگطب النايبات ابشر عليهم دار

احنه انصار

صاحو والضماير صك نداها الكون
واغتاضت سماه ابفزعة الابرار

احنه انصار

انتفض چف السما من سمع هذا الصوت
لبّى .. وما رحم سجيله بالكفار

احنه انصار

صاحو والصدور املاگيات الموت
بيها السيف يهفت والرمح ينهار

بيها العال ينرد والعدالة اتعيش
وميل اسم الصدگ عن صدگه ما مندار

ماجت گاعهم وارتعب جيش الخوف
طگ طوفان دمهم بالطفوف اعصار

خطوا تضحيتهم وشم بالتاريخ
باسم حسين خالد للزمن تذكار

وثّبهم عزمهم وابشرف وفّوه
ولسان المفاخر سولف ابما صار

غضّو لا يذل بيهم مسار الشوف
چيه بحسين عرفو حق الاستبصار

بصيرتهم ضوه ترجمه الدم افعال
وافعال البصاير بالسنين انوار

ذوله انصار الله وطه والزهراء
وانصار الحسن وانصار حامي الجار

ذوله انصار وجه الدين
ما قبلوا تدنسه ابإثم چف العار

ذوله انصار بسم الله
وانصار الحمد
وانصار الاستغفار

صفحات المجد توصفهم بيا حال
وادراك الخيال بمحتواهم حار

ضحوا بس دماهم تصدح لهاليوم
انصارك نظل يا قبلة الاحرار

احمد العتابي
العراقي

[زكي الياسري]

انتفض چف السما من سمع هذا الصوت
لبّى .. وما رحم سجيله بالكفار

غضّو لا يذل بيهم مسار الشوف
چيه بحسين عرفو حق الاستبصار

رحمة الله على الحليب الي رضعته يا احمد
شاعر فذ يشرفني المرور بحروفه النيره
ابدعت بحق

[ايمان حسيني]

سلام عليكم اخويه وعظم الله اجرك
طبعا قبل كل شي عندي عتب اخت ويه اخوها ليش هيجي قطعت افتقدنا انوار تواجدكم وعبير اشعاركم اللي تنبض بحب اهل البيت انتو اخويه شاعر علم متحتاج كلمة مديح او ثناء مبدع كالعاده
سلامي الك ولكل الشعراء اللي عز علينه انقطاعهم عن المنتدى
اتمنى تتواصل بوضع اشعارك
تحياتي

[احمد العراقي]

السلام عليكم
اخي العزيز زكي الياسري
انا لي الشرف الكبير ان ارى تواجدكم يعطر صفحتي المتواضعة
شكرا جزيلا لكم ولهذا الحضور العطر
لاعدمناكم ان شاء الله دائما
ودمتم في حفظ المولى عز وجل ورعايته
وعليكم السلام

[احمد العراقي]

السلام عليكم
اختي الكريمة ايمان حسيني
عتبكم على العين والراس وصحيح اني مقصر وياكم حيل
والتمس العذر من جميع الاخوة هنا لقلة تواجدي لكن ظروف العمل وانشغالي كانت وراء انقطاعي
وان شاء الله بتوفيق المولى جل وعلا لا يتكرر هذا الانقطاع ويكون هناك تواصل شبه مستمر
اتشكر من حضرتكم اختي كثيرا لمروركم وتشريفكم موضوعي
ولطيب كلماتكم الصادقة
بارككم الله تعالى ووفقكم لكل خير
تحياتي واحترامي
وعليكم السلام