[زكي الياسري]

اننا للموت عشاق الحسين
هنا اضع ابيات من صميم الشوق الى حبيبي الحسين عليه السلام .. اهدي ثوابها الى امواتنا و اموات القراء الكرام .. و اموات شيعة امير المؤمنين المنسيين .. راجياً من الله تعالى القبول
و اسألكم الدعاء

الطم لجلك صدري وراسي .. يا بن حيدر
من زينب ماخذ مقـــــــياسي .. يا بن حيدر
واسحكَـ فوكَـ الجمُر ... ما مِل من الطُبر
1
انه بحبك يبو اليمه ... مثل جن عابس انجنيت
لجلك انه ادوس الموت .. بجدام الوفه اتمنيت
و بدربك يبو الغيره ... يا ريت انذبح ياريت
يحسين انه علفطره ... من زغري الك واليت
مجنون ابحبك يا غالي ... بحبك ذايب
وي نبضي اسمع اسمك عالى .. عشكَك واجب
و زنجيلي بالضهر ... تارك احلى اثر
الطم لجلك صدري وراسي .. يا بن حيدر

2
على دربك كضيت اسنين ... عمري بشوكَي اتجوّل
ليل انهار اناغي بيك ... يا عشكَـ الحشى الاول
على حبك ينور العين ... كل ما يجرى اتحمل
لو حركَونه بالنيران ... عن دربك منتحوّل
هيهات ايمنعون ادمـــــوعي ... لو ابجيهه
احرس حبك بين اضلوعي ... من جاريهه
لجلك يرخص دمه ... يا ضنوة فاطمه
الطم لجلك صدري وراسي .. يا بن حيدر

3
يبن بنت النبي عشكَي ... الك بالذر اساساته
و الحطــك مَثَــل اعلى ... لابُــــــد يلكَه غاياته
و اليمشي على نهجك ... لازم تنصـــــــقل ذاته
و يصعـــد قمة الايمان ... لانك انتـــــه مشكاته
يا سيف الاسلام الخالد ... انته المنبع
ما ننساك و الله الشاهد ... لو نتكَطع
اسمك يا بن علي ... محفوظ و أزَلي
الطم لجلك صدري وراسي .. يا بن حيدر
4
متعجبه الخلكَـ يحسـين ... ليش انحبك و ننعاك
ما يدرون ما نكَـــــدر ... لحظه بالزمن ننساك
صح عطشان لكن ماي ... تشرب منك التهواك
ما نتصـَّـــــور العيشــــه ... تحــــــله اْيامهه ابلياك
انته النور البيه اعيوني ... تشوف الجنه
انته الماي البي يرووني ... ليك اتعنه
من حبك ما امل ... لو لجلك انجتل
الطم لجلك صدري وراسي .. يا بن حيدر
5
عمت عين الدهر لمن ... سهمه الصدرك اتسدد
جن عرش الله من صابوك ... برض الفاجعه تمدد
املاك السمه من دم ... تبجي و الفضاء اسود
و لهذا السبب يا ناس ... دم مطرت سمه الفرقد
جبريل و دمعاته ابئيده ... صار ينادي
وا ويلاه انحــــز اوريده ... سبط الهادي
من كطعوا منحره .... دم طاها الي جره
الطم لجلك صدري وراسي .. يا بن حيدر
6
وقف كل عمري يا عمري ... لجلك يا عظيم الشان
اذا ما انذر ســـــنيني ... الك ما انحسب انسان
يلبيك اوجدت اسرار ... تضوي مظلم الوجدان
دمَّك من جره بالطف .... ثَــبَّت جوهر القرآن
يحسين اَضحك لو لامــــوني ... ما فهموني
يحسين اَبجي حيف بدربك ... ما فجروني
يا محله موتتي ... يمك يا مُنيتي
الطم لجلك صدري وراسي .. يا بن حيدر

تمت بحمد الله في 20 / صفر/1431
زكي الياسري النجفي

[عاشقة النجف]

بسم الله الرحمن الرحيم



انا عاشق للمرتضى وشهيده ,, وعجينتي بهوى الحسين تخمرت ..

من علياء الروح نستلهم الحروف فتنسج للحسين بن علي ..
قصائد دونتها الدموع قبل الاقلام جعلها الباري يوم المعاد شاهدا لكم عن الزهراء اخي زكي
بارك الله بكم ووفقكم المولى لكل خير ...
دمت بالف خير

[عاشقة_السيد_القبانجي]

بارك الله بكم اخي كلمات حسينيه جميله
موفق ان شاء الله
دمتم بالف خير وعافيه

[زكي الياسري]

رعاكِ الله يا اختي الفاضله عاشقة النجف
اسأل الباري ان يتقبلها بحق الزهراء
حياكِ الله على هذا المرور العذب

[زكي الياسري]

حياك الله اختي الكريمه
عاشقه السيد
ان شاء الله يحشرنا جميعا في ركب الاباء الخالد

[bahaa ali]

بارك الله بكم اخي كلمات حسينيه جميله
موفق ان شاء الله

[نووورا انا]

متعجبه الخلكَـ يحسـين ... ليش انحبك و ننعاك
ما يدرون ما نكَـــــدر ... لحظه بالزمن ننساك
صح عطشان لكن ... تشرب منك التهواك

لاحرمنا مدام قلمكم اخي زكي الياسري احسنتم

[زكي الياسري]

شكرا يا صديقي بهاء لمرورك العطر

احسن الله اليكم يا نورا .. اسال الباري ان يحشرنا جميعا في ركب الاباء الحسيني الخالد