ياعباس لاتنساني ( في أم البنين عليها السلام )

جابر النجفي · بتاريخ : 09-11-2012 الساعة : 10:44 AM

بسم الله الرحمن الرحيم
اللهم صل على محمد وآل محمد وعجل فرجهم

ياعباس لاتنساني
ــــــــــــــــــــــــــــــــــ
يمكن قراءة القصيده بنفس طور قصيدة ( وعدك وينه ) التي قرأها الرادود الحسيني الحاج باسم الكربلائي
ــــــــــــــــــــــــــــــــــــــــــــــــــ ـــــــــــــــــــــــــــــــــــــــــ
لاتنساني --- لاتنساني === آني أمّك لاتنساني
ياعبّاس إذكرني إهنـــاك === من ترفع للعالي إلواك
لاتنساني --- لاتنساني
ـــــــ
من يوم الطبّيت الداره == دار الحق بيت الأيمـــان
عاهدته الحمّاي إلجـاره == أوفيه إو أصبح عنوان
أنهل من علمه إو أسراره == وأخـــــدم إولاده الشبّـــــــان
وأخدم زينب ماي إعيونـي == وأرضي الزهره أم العطشان
وإبأيمانـي --- وإبأيمانــي === أثبت عالحق وإبأيماني
وأمشي إبأمره الحامي الدين === وأهتـــــــف يامولاي إحسين
لاتنساني --- لاتنساني
ــــــ
ياعبّاس إبزودك يبنــــــي == إكفل زينب من تمشون
ربّيتك عالحب يوليدي == لهــل الآيـات اليهدون
إحفظ زينب روح الزهــــــره == صير الزينب حامي إو عون
وإذكر أمّك يوم الترحــــل == فوزي إبدم نحرك مرهون
من أحزاني --- من أحزاني === إرســــــم دربك من أحزاني
صير الرايه إو صير السور === وإنشــر وسط الحومه النور
لاتنساني --- لاتنساني
ــــ
واعدت آني الحامي حيدر == أرضع أولادي الأيثــــــــــار
أرضعهم حب آل الهـــادي == حب إحسين إبن الكرار
يوفون الأولاد آنـــي أدري == بيهم من حيدر تذكار
بيهم من حيدر إقدامـــــه == بيهم شيمه إو عز أحرار
وإبوجداني --- وإبوجداني === عايش حبهم وإبوجداني
ما أنسه الوالي عبــــاس === وأهتف يارايه الكُل الناس
لاتنساني --- لاتنساني
ـــــ

ودّعت إحسين إو أنواره == يوم الساروا ﮔلبي سار
راح إوياهم ﮔلبــــــي إبهمّه == عاف الروح إو عاف الدار
جسمي الظامي واﮔف دمّــــه == ما يجري إو دم عيني أنهار
غابت عنّي إرسوم الوالي == وإرســـــوم أخوانه الأطهار
محّد جاني --- محّد جاني === يمســــح دمعي محّد جاني
ظلّيت إبهم الأيّـــــــــام === ياعبّاس إو عندي أحلام
لاتنساني --- لاتنساني
ـــ
حب إحسين إحتل كل روحي == ظلّيـــــت أربي الدرب إحسين
وأحلم يرجع وأنهي نوحـي == وإعيوني إتشوفه إبكُل حين
وإتطيب إبأنواره إجروحي == ترجع أيـــــــّام الطيبيـــــن
لكن ضاعت كُلها أحلامي == مـــن ﺷﻓﺗﭻ زينب ﺗﺑﭼيـــن
مهمومه آني --- مهمومه آني === ﮔلبــي إبجمره إو مهمومه آني
دمعي إيصب منذوره العين === وأبعــــــث دمعي لأم إحسين
لاتنساني --- لاتنساني
ــــــ
إخبر ياعبّاس الزهــــــــره == عن حال أمّك يوم إتروح
عن حالي إو جريان العبره == عن ﮔلبــي الظامي المجروح
عن عيني الظلّت تربيله == إبــــــن الحق ذاك المذبوح
عن حزني إو ضيمي إو أيّامــي == عـــــــن روحي الغيّرها النــــوح
ظل عنواني --- ظل عنواني === خدمــــــــة حيدر ظل عنواني
وأخدم زهرة أحمد دوم === وأرجوها إبحق المظلوم
لاتنساني --- لاتنساني
ــــــــــــــــــــــــــــــــــــــــــــــــــ ـــــــــــــــــــــــــــــــــــــــــــــ
مع تحيات شاعر اهل البيت / جابر النجفي