[الشاعر الغريب]

بسم الله الرحمن الرحيم

اللهم صل على محمد وال محمد ووفقنا لخدمتهم

قصيدتي بعنوان جبل الصبر *** واسألكم الدعاء


بتارخ الامم عبره وقصص ودروس***بعيون العقل بيهه اقره واتعـرف

ملاحم وي مدارس كثره راح تشوف***واروع هالملاحم ملحـمات الـطـف

لان بيهه الحسين وصحبته السبعين ***رفعو للعدالــه اطهر علم واشرف

واعظم مدرسه يشهد لها التــــــاريخ ***مدرسة الحسـين البيهه نتشــرف

منهه تخرجت حوراء ال البيت*** ونتيجتـــهـه عظيمه واول اعله الصــف

شوصف بيج وانتي للعقل عنوان**ومثل بنـــــت الصميده ابـــيش تتوصـف

ضكني المستحه والخوف من تقصير***وقبل كلشي اقدم عــذري واتــاسف

شكتب والقلم منج خجل شيكول***وانتي من الشعر اســــمى وارق والطـــف

يابنت النبوه وبت اصول الدين***ياام الصبر والعصــــــــــــمه الج مصـــحف

يابضعة البضعه وضنوة الكرار***يارمز الخدر ومن الـــــــــــخدر انظـــــف

يانور الرساله الضوه ارض الشام***ياصبر الشريعه الماخــلص لو جـــــف

شكول اعليج وانتي من الكلام اكبر***يم قلب الجــــبير المافرح واتـــــــرف

عجز حتى الصبر عن صبرج اتكتر***يانــــــهر الصبر يجري وفلا ينشــــف

من صبرج يزينب خضرن الدموع***يابيــــــــرغ صبر فوك الحزن رفــرف

شني صبرج من شفتي الجفوف اطيح***جــف يومي عليج وعالمخيم جـــف

وشني صبرج من شفتي الشرع منحور***ولـعد صوب الخـدر نظراته تتلهف

زلم اقسم ابد ما تحمل اللي صار***حمل اجبال حملج اقســــــــم واكلــــــف

من يانوع صبرج ياجبل فولاذ***وتكوينــــــــــــــه شني ومنيـــــن يتـــــــالف

مابيه كل حدود ولا حجـــــــــم معروف***وما عنده محطـــه وبيـهه يتوقــف

بطف كربله خالقنـــــــه عنده اسرار***وبيهه انتي يزينـــب اعلــم واعـرف

واني بنظرتي انظر عكس هالناس***وانخه من الجليــل بحالي يتلطـــــف

ماشوفج اسيره ولا اشوف قيود***ولا شوفن ســلاسل عالركـــب تلتـــف

اشوفن ال اميه وكل بني سفيان***كلهه بحضـــرتج مرعوبــه تتخــــوف

واشوف ايزيد حدر امداسج انـداس***اشوفنـه ذليــــل بذلتـــه مجتـــــف

لان انتي الاصيله ومنبع الاطهار***وبيج اصل الطهــاره وعفه تتعــرف

ياكعبة الشام وثورة الاحـــــرار***اسـراب البشر كل يوم الــج تزحــف

لولاج العقيده اتضيع المضمون ***وجـا كــل المـسيره بخــوف تجتــف

وجاغطه الحقيقه الجور والطغيان***ويظــل هذا النهـج مولاتي يتخلــف

ولوما صبرج وذاكه الصمود البيج***تضيـع اهداف ابو السجاد لو تتلـف

ولوما هالشــــموخ وذالكه الموقف***جا ثـــورة حسين بيومـــه تتوقــف

[عبدالله خلف العتابي]

شاعرنا المبدع حقا وبدون مجامله اقوك
بارك الله في جهودك الرائعه ولك اهدي
دارمي كتبته لسيدي العباس(ع)
هم شهم هم وفاي ماتلكه مبخوت
سر الوفه عباس والباقي طاغوت

الصغير دوما
العتابي

[الشاعر الغريب]

يشرفني مرورك وردك

دائما انت مبدع في دارمياتك الصادقه ادعو الله تعالى ان يوفقك لمراضيه

[سفينة البحار]

رائعة هي هذه الكلمات التي تنحدر من قلم مبدع
كالبحر الهادر
السلام على جبل الصبر
جعلها الله في ميزان اعمالك
تحيــــــــــــــــــــــــــــــــــــاتي

[الشاعر الغريب]

اكرر لك شكري ياسفينة البحار

عند اليحب حسين تظــــهر علامه

ينضح محنه وطيب ويصب شهامه