[زكي الياسري]

من جديد قصائد محرم 1434 هـ .. قصيدة اهدي ثوابها لكم و الى ارواح امواتكم
و اموات شيعة امير المؤمنين من لا ذاكِــــــــــــــــر لهم يذكرهم و اسألكم الدعاء
----------------------------------------
عنوان القصيدة ... الحسين كعبة الاحرار
----------------------------------------

يا كعبة الأحرار ...... يحسين يا مظلوم

يا فِكرة الثــــوَار ...... تتجــدَّد ابكل يوم

لا والله ما ننســــاك ........ لآخـــر نـفـَس ويّاك

يحسين يا مظلوم

1

يا وارث الكـــرار .. يا بـادي مَبدانه

تبقه يبو الاحــرار .. نبــراس دنيانه

و أكلوب كل الناس .. بهواك هيمانه

يا حافِظ الإســـلام .. وآيـــات قـُـرآنه

يا شمس تزهي ابنور ... ضوَّت سمه الإسلام

يحسين نبقه انثـــــور ...... شما جارت الظلام

خلتــزعل المَتـــــــريد ....... شمــا زادوا احنه انزيد

يحسين يا مظلوم

2

خدمِتك يا مَـــولاي .. مِحـــوَر عقيدتنه

هاي الخَدامة اوسام .. بي نبني رفعتنه

والدمعه من اتسيل .. مذخــورة دمعتنه

بالبرزخ امن اتصير .. هلدمعه شمعتنه

سيل الدمِع مذخور ............ يحمينه من النار

بالگبر يصبح نـور ............ يا مشعَـل الأنوار

شما يكثــر التجريــــح ......... يبگـــه المُوالي يصيح

يحسين يا مظلوم

3

يا رافع الاســلام .. يمعَـلـّــي راياته

يا حافظ القـــرآن .. يا تالــــي آياته

بالخدمـة للـوالاك .. تِشفي جراحاته

يالبيك كل مهموم .. يتناسه مأساته

سجلنه بالأنصــــار ....... وي شبلك الموعود

مهدينه راعي الثـــار .... ذوله احنه ليك اجنود

يالمهدي هلأبطــــــــال ........ تسمع صداها شگال ؟

يحسين يا مظلوم

4

دمّك يثــــــــار الله .. دمّك صُبـــح بركان

كل مرة بينه يثــور .. في داخـل الوجدان

منهل عطاء و خير .. لكل معشر الانسان

دمّك سبيل الفــوز .. ضد منهَـج الشيطان

سُبحانه مَن عَــلاّك ........ فوگ البشَر يحسين

سُبحانه مَن خَـــلاّك ........ حـارس حدود الدين

يبقه عزمنه اچبيـــر ............... ضد منهَــج التكفير

يحسين يا مظلوم

5

عابس صُبح مجنون .. فِـــدوه إلك يحسين

وكلحنه هذا اليـــــوم .. مثلــــــه فِــدائيّيـن

شما گطـِّعَتنه اسيـوف .. منعـوفك و مَـنلين

هَــذا العهــــــــد والله .. مِنـّـــا لــَـيوم الدين

ثوار نبگــــه وحيف .......... نتراجع و ننساك

يشهد علينه السيـف .......... گطـَّعنه ما عفناك

خلتسمع الاشــــــرار ........... صرختنــــه مهما صار

يحسين يامظلوم

6

لامونه نبچي اعليــك .. نلطم عليك الراس

يا من بلا طـــــرواك .. ما تنفــــع الانفاس

جهلوا يبو الاحـــرار .. مغزانه ذوله الناس

مغزانه ننطي الـروح .. مثل الگمــر عباس

خيگطـِّـعون اچفــوف ......... لا والله لا مَـنـتــوب

حَطــَّينه علمكشــــوف ........ فوگ الدروع اگلوب

من كربله هالصـــــوت ............. بي نلتـــــــزم للموت

يحسين يا مظلوم

زكي الياسري النجفي

29/08/2012