[ابو ظاهر البركي !]

علمني ابوي وبعد يداي
اصبر لو جرح بلعين يداي
لذلك صدكت مديت يداي
خذو يدي غفل صدكان اليه

خاصرة يدي

بحلم لني ادورعلى البصمات

بلجن الكه بصمه ابين الجفوف

اهن ضاعن امس بمصافح الناس

رغم لون الي بيهن جان معروف

خذاني الشوف لن معرض لليدين

منهه معلكه ومنهه عللرفوف

ولكيت مطرحه وممدوده لساه

ومنهه العوز ضكهه وكامت تحوف

ومنها انباست من الكفه وعلراح

ومنهه مكبعه من الرعب والخوف

ومنهه اتذبحت بحراب الايام

لاجنهه بصبرها جراحهه تروف

وشفت جفوف ذبلانه وعزيزات

عله محراب الكرامه جايه تطوف

ردت عراف يعرف يقره الجفوف

دورته ولكيته ابين الصفوف

بلجن يعرف ايفرزن باليدين

نخيته وجنت ذيج الساعه ملهوف

كال اشرحلي قصتك ليش محتار

كمت اشرحله شنه الصار بيه

شفتهم سلمت جنت اضن صحبان

غلو خنجر خيانه بديه

عصرو خاصرة ايدي حرامات

ماجنت اعتقد ناوين نيه

خذو مهجة جفوفي اعتقد شمات

وبلاية مهجه اجيتك كوم ليه

كام ايدور ايريد اثر للراح

بعد مايأس منهن رد اليه

كال شلون الكه الاثر هيهات

بعد متجيبه حاضر مر عليه

كلتله امنين اجيبن الك طبعات

خلص كلشي الي عندي وهاي هيه

احلفك بالذبيح المات عطشان

واحلفك بخته ذيج اخته السبيه

تغير لونه كال اتحب الحسين؟

كلت عمري فده لابن الزجيه

كال افتح قميصك نلكه بصمات

اثر من جنت تلطم مو خفيه

فتحت صدري ولكيت اثار بينات

لديه عللجره بالغاضريه

كام ولطم صدره ويطلق اهاة

وكال اتحزم ونلطم سويه

ولن جفين من كربلا مشرعات

نثرت روحي عليهن واهليه

خادم اهل البيت
ابو ظاهر البركي