[الشاعر سعيد الفتلاوي]

قصيدة / يوليدي يا عبد الله
....................................
....................................

يوليدي يا عبد الله

فّراگك صعب ياهو اليسد مْچانه
دمعي دمه وْروحي تون حيرانه

يوليدي يا عبد الله

..............

روحي بعدك من يِسرها – وْفرحتي ياهو اليِردها
دنيتي غابت شمسها – مْصيبتي سرمد حزنها

گلبي يا يمّه انفجع – مو بس دمه ينزف جمر شريانه

..............

ظلمه بعدك يمّه داري – بْليلي انعاك وْنهاري
دْموم دمع العين جاري – بعدك آني المن اداري

يْنوح ويّاي المهد – لجلك حزن اسود لبس ويّانه

..............

باسمك تْنادي العليله – وْتنشد عْليك العقيله
هْناك اخويه من يشيله – شْلون ياعمتي الجليله

من يسكته لو بچه – لا امي يمّه وْ عالثره وليانه

..............

بيتي ظل بْلايه والي – بس حزن والهم صفالي
بعدك ايامي ليالي – يالولد يبني يغالي

مات ويّاك الامل – مهضومه بعد اللي جره وْحزنانه

..............

لحظه ما فارگني رسمك – ريتك اتعود وْ اشمّك
بْگلبي يوليدي اضمّك – فدوه روحي تْروح لاسمك

اه يا طف كربله – عالمذبحه شاهد يظل ميدانه

..............

حرمله شْسوّيت بيّه – يا لعين الغاضريه
طفلي راويته المنيّه – ليش يا شر البريّه

بْسهمك ابني مِنذبِح – ابشع جريمه هالسهم راوانه


....................................
....................................

خادم اهل البيت ( ع )
الشاعر الحسيني
سعيد الفتلاوي الطويرجاوي