[احمد العراقي]

من وزن المجرشة

راية العباس عليه السلام

من يسكت لسان الشعر
وحروفه ما يلگيها

ومن ينخسف وجه الگمر
والدنيا ما يضويها

ومن تختفي انوار الشمس
وانهارها امتانيها

ومن تترك النجمة السمه
ومحد يگول اشبيها

ومن عينه يغمضها الدهر
عن البصر يعميها

ومن يعطش ابمايه النهر
وجروفه ما يرويها

ومن توگف الگاع ويمل
جدم البشر يمشيها

معناها راية حيدره
العباس رفرف بيها

هالراية ثبتت ما گدر
زيف الظلم يلغيها

راية حقيقة وتضحية
ودم الفدا امحنيها

منسوجة بحسين وخذت
هيبتها من راعيها

مرفوعه بجفوف الفضل
يا راية الـ اتجاديها

لو رفرفت كل الفلك
دار ابكيانه اعليها

سرهه جزه احدود العقل
وادراكه ما يحويها

احمد العتابي
العراقي