[** مسلمة سنية **]

عذرا لتأخري ... بس حماتي ربنا يطوّل بعمرها عزمتني على جاج محشي >>> و طبعا أنا ما رفضتلها طلبها ....



*****


نرجع لفيلم الآكشن اللي صار معي ... اعذريني حبيبتي نسايم عالتحدث بالعامية في هاد الرد علشان أعرف أعبر عن الموقف ...


هاد في يوم من سنة 2003 تأزم الوضع ... و كالعادة توجهنا للجامعة ... لكن متل ما حكيت الوضع كان متأزّم ... و كان لازم نصل الجامعة يومها ... طريق الجُبيل كان فيه كمين ... حتّى اللي كانوا بدهم يتسلّقوا الجبل العملاق برضو سمعوا انّو بنهايتو عالطرف التاني كان الصهاينة مجهزين كمين ... انحشرنا بين الجُبيل و بين الحاجز العسكري ... استمرّ لوضع تقريبا 3 ساعات من الكرّ و الفرّ ... و شباب بيهربوا من بعض المناطق و صار في إطلاق نار .... و توتّر الوضع أكتر ... و توترنا لأنّا انحشرنا ازا ارجعنا بنصير في منطقة اطلاق النار ... و ازا اتقدمنا فهناك الحاجز العسكري و هم في اشد الاستنفار ...



بعد تفكير و تردد كبير قررنا نغامر و نلف من الجهة التانية .... كنّا شفنا كم واحد لفّوا منها و ما مسكوهم ... الوضع في مغامرة كبيرة ... مزبوط التركيز عالجهة التانية لكن هاي الجهة قريبة منهم ... و فيها مناطق مكشوفة ... لكن ما عاد في أمامنا خيار فالوضع بيزداد سوء ... توجهنا لهديك الطريق ... كنت أنا مع 3 صديقات لي و بتوقع كان في كمان بنتين معنا ...

بعد ما لفّينا من حولهم و فكّرنا حالنا ملصنا ... شافونا و احنا بنتنقل في المنحدرات ( في بيوت و في شجر لكنهم شافونا و احنا بنتحرك ) ... استنفروا ... و تحرّكت دورية تستنانا في الطريق اللي مفروض نصل الو ... تسمّرنا خلف أحد البيوت و صرنا في وضع لا نحسد عليه ... ما عاد في صوت لصريخهم و لا في صوت للدورية ... فوحدة من البنات الشاطرات طلّعت راسها من ورا البيت علشان تشوف ازا راحوا ... و بسرعة لمحوها كأنّوا عيونهم كانت على هاد البيت .... رجعت أصواتهم ... خفنا ... تلبّكنا .... ما عرفنا شو نعمل ... دقّينا على باب البيت اللي كنّا متخبين وراه ... فكّرناه بيت لعائلة من عائلات المنطقة ... طلع يا حرام سكن طلاب ... فتحلنا شاب بيفرك في عينيه و مستغرب ... ما حكينا معو .... و ما استأذناه ... و لا عبّرناه ... دخلنا بسرعة كأنّو البيت بيتنا ... فتنا على أول غرفة ... لقينا شباب نص نايمين ... طبعا انصعقوا لمّا شافونا ( حضراتهم نايمين و الدنيا برّا مولعة لكن أكيد تعودوا عالوضع ) ... المهم لمّا شفناهم هيك بسرعة رحنا عالغرفة التانية لقيناها كبيرة و مكشوفة ما بتنفع نتخبّا ( مسكينات كأنو في محل الواحد يتخبى فيه بس شكلنا كنّا مش قادرات نفكّر ) ... تحركنا للمطبخ ( طبعا و الشباب مش حاكين معنا و لا كلمة مساكين آآآآآآآآآآآه ... عن جد مساكين ) ... المهم رحنا عالمطبخ ... لقيناه صغير معتّم ( توهمنا انّو مناسب ) ... تخبينا في الجهة اللي ورا الباب ... ازا رميت الابرة في المطبخ ساعتها كنت رح تسمع رنّتها ... اعصابنا مشدودة ... دخلوا الجيش طلّعوا الشباب ( أكيد دعوا علينا و معهم حق ) ... فتح واحد من الجيش باب المطبخ و ربنا أعمى بصره و ما شافنا ... دوّروا ما في حد !!!! البيت صغير .... استغربوا !!!!! قائدهم ربنا يخزيهم كلهم رجع فتح باب المطبخ و فات علينا ... ساعتها ما بعرف بس بلا شعور رفعت راسي للسما و صرخت بقهر " يااااربييييييييي" .... يمكن كان مبيّن القهر بصوتي .... شكلوا قائدهم تأثّر ( حسّاسين مشا الله )... طلّعونا برّا البيت ..و جابوا لي كاسة ماي ... لكن كانت الدنيا رمضان فما شربت .... صار يحاول يهدّي فيّا و يحكيلي طيّب ليش لفّيتوا من ورا لازم جيتوا عالمحسوم و كنّا سمحنالكم تمرّوا >>> كذب عينك عينك ... أخدوا هوياتنا و عملوا حالهم بيعملوا في اتصالات ... علشان يسمحولنا نمر ... و ركّز القائد على اسمي و خبّرني تاني مرّة بتيجي و انا بخلّيك تمرّي أما ازا مسكتك بهيك وضع فساعتها ما تلومينا ( طبعا بيحكوا عربي أحسن منّي و منكم ) .... المهم هاد الكلام طبعا ما طمنّي ابدا بالعكس خوفني كتير ... لأنّو اليهود مالهم أمان ... و المحسوم احنا عرافينو نكد و ما بيفتح ... و رح نضطر انّا نروح عالجامعة تهريب ... فكونوا حفظ اسمي و ركّز عليه ... فهاد الوضع ما كان مطمّن أبدا ...

المهم سمحولنا نروح عالجامعة ... بالجامعة كانوا عارفين انو الوضع متأزم استغربوا كيف قدرنا نوصل ... فكانوا البنات اللي معي يحكوا >>> مرقونا علشان حزنوا على فلانة ( اللي هي أنا :o ) .... عاد أنا فعلا ما بخاف منهم بالوضع الطبيعي و الي مواقف من و أنا بنت صغيرة ... لكن لمّا صرخت و استنجدت بربّي كان هاد لشعوري بالذل و القهر .....


المهم الوضع استمرّ على ما هو عليه .... و قائدهم ما شفناه بعدها لحسن حظي ... لأنو بيصير تنقلات عندهم ..... و صارت معي مواقف كتير و مغامرات كتير متفرقة من هالنوع حتّى انهيت دراستي على خير ....





>>> بتمنى ما تتضايقوا لمّا تقرأوا القصة لأنو حاليا أنا و صاحباتي لما بنتذكرها بنكون نضحك ... يعني متل ما حكيت مغامرة و عدّت على خير ...




و هاد هو فلم الآكشن خلّص >>>> فيري سوري نسومة كسّرت كل قواعد اللغة ... مع اني ممكن أكتب بالفصحى منيح ... لكن لمّا احب اعبّر عن حالي بفضّل العامية لأني بلاقيها أقرب للتعبير عن نفسي .... فيري سوري


و توتة توتة .... خلصت الحدوتة




u can sleep now