[الشاعر سعيد الفتلاوي]

قصيدة / الليله عزّي فاطمه بحسينها
................................
................................
.
.
يالموالي وْياي گوم وْعينها

الليله عزّي فاطمه بحسينها

.
.
........................



ناده ابو السجاد يوم الملحمه – بالغدر والغيض كلها مْحزّمه

كل لعين يْريد ياخذ مَكرمه – بالطفوف الگوم باعت دينها

.............

اِبچي عالمظلوم وانعه حالته – سْهام غدر الگوم گلبه صابته

ظل وَحيد يحوم رافع هامته – صف شِمال الجيش ويّه يْمينها

.............

خانو الظلّام سبطك يالنبي – غدرو الانذال مولانه الابي

تبعو الملعون ابن الناصبي – عالمُلِك والمال عِمْيت عينها

............

بكربله مولاي تاريخك يظل – مْسجِل الاحداث والطاغي شْعمل

يومك الهاليوم مثله ما حصل – هالجريمه الظالمه احنه نْدينها

............

بْركضة طويريج وقّعنه العهد – تبقه ثار الله دوم وْ للابد

نفتديك ارواح ماهمنه العدد – ركضة طويريج سِر تكوينها

............

اِلمصاب البيك هوّه الاولي - بْكل عزه للشيعه ذكرك يالولي

باللطم وِبْصوت تهتف يا علي – هالولاء يْدوم بينه وْ بينها

............

يا ابو الاحرار منّك كل عزم – لا اَمن مولاي عِدنه وْلا سِلم

نْريد راعي الزود النه الينتقم – عالطغات يثور يفني شينها

.
.
...............................
...............................

خادم اهل البيت ( ع )
الشاعر الحسيني
سعيد الفتلاوي الطويرجاوي