[الشاعر سعيد الفتلاوي]

ابو ذيّات لمولد الامام علي
عليه الصلاة والسلام
........................................
........................................



بْعلي الكرار ربنه مَن علينه – رضا الباري وْ رسوله مِن علِينه

نعم لو ما علي الدر مَن علينه – اسالك نلگه مثله بْهالبريه

.............

علي بْاعظم كتاب انصاغ بالنَص – علي بْسيفه العدوّه يجسمه بالنِص

علي المانزّل الراس وْ فلا نَص – همام وْ هامته تْلوح الثريّه

..............

علي الدرّ المصفى شلون وصفاك - رفع شانك اله الحق وصفّاك

ربح كلمن اجه برحلك وصفّاك – العلي علّاك يا حامي الحميه

...............


يِنَوّر كل فرح اسمك وعِيده – مدد لاسمك علي نْصيح وْنِعيده

بفرحنه الكل يجدد لك وعِيده – فداك نْروح يا حامي الحميّه

................

مجالس باسمه هيئات وْ دوواوين – وْ قصايد واجمل اشعار بْدواوين

بْسقر كلمن بغض اهله وْ دِواوين – النكر حق الوصي وْحق الزچيه


.....................

بطل هالامّه يا والي عِلمها – علي عالم بالافلاك وْعَلمها

تحل كل مشكله وْ عندك علِمها – صعب نوصف قواك العالميه



........................................
........................................

خادم امير المؤمنين ( ع )
الشاعر الحسيني
سعيد الفتلاوي الطويرجاوي