[منذر الساعدي]

زينب التأمر أمر

انتي بس كولي يزينب بالطفوف
وداعت اعيونج لأطشرها الصفوف
أشري يابت حيدره
ميمنه أولو مَيسره
وداعت اعيونج لأطشرها الصفوف




كولي يا زينب امنين ابديهه
اجيوشهه إمن الكاع راح امحيها
ضَربتي البتاره ما أثنيهه
واني ابن حيدر علي حاميهه
زينب التامر أمر
وسيفي اليشطر شَطر
هذا سيفي وينهه اليوم السيوف
وداعت اعيونج لأطشرها الصفوف




اليوم يومي استبشري يابت علي
واني ابو فاضل ابجالي اتدللي
انتي بس كولي يتربات الولي
لا تهابي الجيش خليهم الي
لا تراويني الدموع
ولا تهمج هالجموع
اعيوني الج يا زينب إوذني الجفوف
وداعت اعيونج لأطشرها الصفوف




أل امية اليوم زينب تنتظر
محكمة كل جيشهم يم النهر
هيه حاكم والحُكم بيهم صدر
وسيفي الينفذ بعد وين المفر
صِيحوا يازينب دِخيل
خلصينا إمن الكفيل
والقصاص اليوم خل زينب تشوف
وداعت اعيونج لأطشرها الصفوف




عَالوَعد كَفالج اشما ينجرح
حتى لو كون السلامه ما تصح
بعد كَطع اجفوفي وافقت أنذبح
حتى راسي اوياج يرجع عالرمح
اجفوفي عالرايه بقن
وراسي يحرس للضعن
عَدل لو ميت اوياج إوما اعوف
وداعت اعيونج لأطشرها الصفوف


الشاعر
حسين الساعدي