[حــــــــوراء]

الفصل الخامس

الجزء الثانى

قررت فوزيه تكلم اليوم عمر عن البنت الي قالت عنها نورا ... بعد ما رجع عمر من الشركه .. نادته امه وقالت له يلحقها غرفتها ..عمر الي استغرب من امه ..ايش تبي منه لدرجه انها ما تبي تكلمه عند احد ...
عمر: خير يا يمه ..ابوي فيه شي
ام عمر: لا سلامته ... ابوك مافيه الا العافيه ... بس بغيتك في موضوع يخصك انت..
عمر: سمي ..امرى يالغاليه
ام عمر: يا ولدي انا حالك مو عاجبنى ابد ..
عمر: ليه وايش فيه حالى ..
عمر: ما تشوف طول يومك بالشركه ..ترجع على نهايه العصر تجلس معنا شوي بعدين تطلع .. والله كانك عازب ...
عمر: يمه الله يهديك وانا ايش الحين .. مو عازب
ام عمر: وهذا غلط مين .؟؟
عمر: اتوقع انى ما شكيت من حياتى ... ليكون يايمه بتفتحين لى سالفتك المعهوده..انتى تعرفين رايي فالموضوع؟؟
ام عمر: لا الحين غير الحين اخوك تزوج ..والمفروض تلحقه..
عمر: بس انا خلاص تزوجت قبله وعندي بنت والا مو ماليه عينك..
ام عمر: بس انا ابي يكون عندك ولد يشيل اسمك...
عمر: ليه مي مين ابوها مو انا ...مو هي شايله اسمى
ام عمر: مي بنت
عمر: واذا بنت .... يمه ما اتوقع ان عقلك من عقول اهل الجاهليه .. بنت او ولد ما يفرق
ام عمر: الا يفرق .. الولد يشيل اسمك وعياله وعيال عياله كلهم يشيلون اسمك .. بس البنت غير..
عمر: والله كلام غريب هذا وانتى يايمه المراءه الفاهمه الدارسه تقولين كذا
ام عمر: وليه ما اقول... عمر فرحت بعبدالعزيز خلنى افرح فيك
عمر: اذكر انك فرحتى لي مره ..مو كافيه
ام عمر: لا مو كافيه .. عشانى .. عشان ترضينى تزوج ..نورا اختك تعرف وحده تقول تهبل .. بنت ناس اجاويد والنعم فيهم..
عمر: يمه تكفين ... مابي اسمع بهالسالفه مره ثانيه...ونورا هذي اعرف شلون اسكتها مشتغله لنا خطابه..
ام عمر: اختك ما تبي الا مصلحتك عيب تقول عنها كذا...
عمر:مصلحتى انا ادري فيها .. وهالموضوع منتهين منه ... واذا عن الاسم مثل ما تقولين عندكم عزيز هذا هو تزوج وانشالله يجونه عيال يشيلون اسمه واسم العيله
ام عمر: مو بس مساله اسم ... انت تحتاج يا عمر.. لازم عندك احد يهتم فيك..
عمر: اتوقع انى اعرف اهتم بنفسى ...
ام عمر: طيب بنتك ..مي.. ماتبي احد يهتم فيها .. مي كبرت يا عمر ..وتحتاج احد يداريها ويشوف مصالحها..
عمر: اشوفها مثقله عليكم..
ام عمر: لا ياعمر ازعل منك كذا ... مي بعيونى مثل منت بعيونى .. بس انت ادري انا كبرت ومو قادره على التربيه مثل اول ..التربيه يبي لها شده ...وانا قلبي مع الايام يحن لعيالكم ولا اقدر اشد عليهم .. وخواتك بيتزوجون وكل وحده بتروح لبيت رجلها...
عمر: انا موجود ...
ام عمر: انت رجال .. وهي تحتاج لمراءه تاثر عليها مو رجل...
عمر: مستحيل اجيب وحده تحل محل فاطمه ... وتصير مرت ابو على بنتى ..وانا ايش عرفنى انها بتحن عليها...؟؟؟
ام عمر: هالسوالف يا ولدي ما تشوفها الا بالمسلسلات والافلام ... والبنت الي اكلمك عليها والنعم فيها ...
عمر: يمه... لو تسمحين عشانى لا عاد تكلمينى بهالموضع ...
ام عمر: بس ما يصير...
عمر: شوفي يمه متى ما حسيت انى ابي اتزوج صدقينى بقول لك ...بس الحين مابي.. وكافي عزيز نفرح فيه ..ايه صح ما قلت لك ..تراه يوم الاثنين بيجون ...على الساعه 10الصبح...
ام عمر: عزيز ما قال لى ليه
عمر: ابوي توه قايل لي بالشغل .. يقول بالاول ماكان الحجز اكيد...
ام عمر: اجل لازم نسوي لهم عزيمه كبيره...
عمر: والله هذا شغلكم مو شغلى .. يالله عن اذنك يمه ...
ام عمر: ايه عرفت تغير الموضوع .. بس لا تنسى على وعدك؟؟
عمر باستغراب : أي وعد ..؟؟
ام عمر: مو تقول انك اول ما تبي تتزوج بتقول لي...
عمر: هههههههه... ابشري يالغاليه...
وطلع عمر ..امه مو راضيه تنسى هالموضوع وهالمحادثه يمكن انعادت10 مرات قبل ذي... وكل مره يرد عليها نفس الرد ... فرح يوم تزوج اخوه على اساس ان موضوعه خلاص ... بس هذا عزيز مارجع من شهر العسل والموضوع انعاد .....راح لغرفته عشان يريح بعد الشغل .. وراه طلعه ..واعد اليوم مي ياخذها لتويز ار اص......................